സംസ്ഥാനത്തെ അന്തിമ വോട്ടര് പട്ടിക ഇന്ന് പ്രസിദ്ധീകരിക്കും
തിരുവനന്തപുരം: നിയമസഭാ തിരഞ്ഞെടുപ്പിനുള്ള നാമനിര്ദേശ പത്രികകളുടെ സൂക്ഷ്മ പരിശോധന ഇന്ന് നടക്കും. 140 മണ്ഡലങ്ങളിലായി 1252 പേര് പത്രിക നല്കി. സ്ഥാനാര്ത്ഥിത്വം പിന്വലിക്കാനുള്ള സമയം അനുവദിച്ചിരിക്കുന്നത് മാര്ച്ച് 26 വരെയാണ്.
പല മണ്ഡലങ്ങളിലും പ്രമുഖ മുന്നണികള്ക്ക് വിമത സ്ഥാനാര്ഥികള് രംഗത്തുണ്ട്. ഇവരെ 26 നകം അനുനയിപ്പിക്കാനുള്ള ശ്രമത്തിലാണ് നേതാക്കള്.
അതേസമയം സംസ്ഥാനത്തെ അന്തിമ വോട്ടര് പട്ടിക ഇന്ന് പ്രസിദ്ധീകരിക്കും. ഇത്തവണ 2.72 കോടി വോട്ടര്മാരാണ് വിധിയെഴുതുന്നത്. ഏറ്റവും കൂടുതല് ആളുകള് പത്രിക സമര്പ്പിച്ചത് കൊടുവള്ളി മണ്ഡലത്തിലാണ്. ഇവിടെ 18 പേരാണ് പത്രിക സമര്പ്പിച്ചിരിക്കുന്നത്. തിരുവനന്തപുരം മണ്ഡലത്തിലും മഞ്ചേശ്വരം മണ്ഡലത്തിലും 17 പേര് വീതം പത്രിക നല്കിയിട്ടുണ്ട്. കോഴിക്കോട് ജില്ലയില് ആകെ നാമനിര്ദേശപത്രിക സമര്പ്പിച്ചത് 223 പേരാണ്.