തിരുവനന്തപുരം: സംസ്ഥാനത്ത് കാലവര്ഷത്തിന് മുന്നോടിയായി മഴ ശക്തമാകുന്നു. തലസ്ഥാന ജില്ലയായ തിരുവനന്തപുരത്ത് കനത്ത മഴയെത്തുടര്ന്ന് കേന്ദ്ര കാലാവസ്ഥാ വകുപ്പ് ഓറഞ്ച് അലര്ട്ട് പ്രഖ്യാപിച്ചു. കനത്ത പേമാരിയില് നഗരത്തിലെ പല താഴ്ന്ന പ്രദേശങ്ങളിലും ഇതിനകം തന്നെ വെള്ളക്കെട്ട് രൂപപ്പെട്ടിട്ടുണ്ട്.
അടുത്ത അഞ്ച് ദിവസത്തേക്ക് കേരളത്തില് പരക്കെ മഴ തുടരുമെന്നാണ് പ്രവചനം. ഇടിമിന്നലിനൊപ്പം മണിക്കൂറില് 50 കിലോമീറ്റര് വരെ വേഗതയുള്ള ശക്തമായ കാറ്റിനും സാധ്യതയുണ്ട്.
അടുത്ത അഞ്ച് ദിവസങ്ങളില് വിവിധ ജില്ലകളില് കേന്ദ്ര കാലാവസ്ഥാ വകുപ്പ് മഞ്ഞ അലര്ട്ട് പ്രഖ്യാപിച്ചിട്ടുണ്ട്. കോട്ടയം, എറണാകുളം, ഇടുക്കി, കോഴിക്കോട്, വയനാട്, കണ്ണൂര് ജില്ലകളില് ഞായറാഴ്ച യെല്ലോ അലര്ട്ടാണ്. ജൂണ് ഒന്നിന് പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്, മലപ്പുറം, കോഴിക്കോട്, വയനാട് ജില്ലകളില് യെല്ലോ അലര്ട്ടാണ്.
പൊതുജനങ്ങള്ക്കുള്ള ജാഗ്രതാ നിര്ദേശം
മഴയ്ക്കൊപ്പം ശക്തമായ ഇടിമിന്നലിനും സാധ്യതയുള്ളതിനാല് പ്രകൃതിക്ഷോഭ ജാഗ്രത പാലിക്കണം. താഴ്ന്ന പ്രദേശങ്ങളില് താമസിക്കുന്നവരും മലയോര മേഖലകളില് ഉള്ളവരും പ്രത്യേക ജാഗ്രത പുലര്ത്തേണ്ടതാണ്.