കോഴിക്കോട്: കാലവര്ഷം അതിശക്തമായതോടെ വടക്കന് കേരളത്തില് അതീവ ജാഗ്രതാ നിര്ദേശം. കനത്ത മഴയെത്തുടര്ന്ന് കാസര്കോട്, കോഴിക്കോട്, വയനാട് ജില്ലകളിലെ പ്രൊഫഷണല് കോളജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ശനിയാഴ്ച ജില്ലാ കളക്ടര്മാര് അവധി പ്രഖ്യാപിച്ചു. മൂന്ന് ജില്ലകളിലും റെഡ് അലര്ട്ട് നിലനില്ക്കുന്ന സാഹചര്യത്തിലാണ് മുന്കരുതല് നടപടി.
പ്രൊഫഷണല് കോളജുകള്, സ്കൂളുകള്, അങ്കണവാടികള്, ട്യൂഷന് സെന്ററുകള്, മദ്രസകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്ക് അവധി ബാധകമാണ്. അതേസമയം റസിഡന്ഷ്യല് സ്കൂളുകള്ക്ക് അവധി ബാധകമല്ല. മുന്കൂട്ടി നിശ്ചയിച്ച പൊതുപരീക്ഷകള്ക്കും സര്വകലാശാല പരീക്ഷകള്ക്കും മാറ്റമുണ്ടായിരിക്കില്ല.
പലയിടങ്ങളിലും വെള്ളക്കെട്ട് രൂപപ്പെട്ട സാഹചര്യത്തിലാണ് അവധി പ്രഖ്യാപിക്കുന്നതെന്ന് കോഴിക്കോട് ജില്ലാ കളക്ടര് എം.എസ് മാധവിക്കുട്ടി അറിയിച്ചു. ദുരന്തനിവാരണ സേനകള് സജ്ജമാണെന്നും അനാവശ്യ യാത്രകള് പൂര്ണമായും ഒഴിവാക്കണമെന്നും അധികൃതര് വ്യക്തമാക്കി.
മലയോര മേഖലകളില് ഉരുള്പൊട്ടല് ഭീഷണിയുള്ളതിനാല് രാത്രികാല യാത്രകള്ക്ക് കര്ശന നിയന്ത്രണമേര്പ്പെടുത്തി. താലൂക്ക് കേന്ദ്രങ്ങളില് 24 മണിക്കൂറും പ്രവര്ത്തിക്കുന്ന കണ്ട്രോള് റൂമുകള് തുറന്നിട്ടുണ്ട്.