ന്യൂഡല്ഹി: രാജ്യസഭാ കാലാവധി പൂര്ത്തിയായതിന് പിന്നാലെ ജോര്ജ് കുര്യന് കേന്ദ്രമന്ത്രി സ്ഥാനം രാജിവെച്ചു. രാഷ്ട്രപതി ദ്രൗപദി മുര്മു അദേഹത്തിന്റെ രാജി ഔദ്യോഗികമായി സ്വീകരിച്ചു. ജോര്ജ് കുര്യനെ രാജ്യസഭയിലേക്ക് വീണ്ടും പരിഗണിച്ചിരുന്നില്ല.
മൂന്നാം മോഡി മന്ത്രിസഭയില് ന്യൂനപക്ഷകാര്യം, മത്സ്യബന്ധനം, മൃഗസംരക്ഷണം എന്നീ വകുപ്പുകളുടെ സഹ മന്ത്രിയായിരുന്നു ജോര്ജ് കുര്യന്. ഇനി അദേഹം സംഘടന ചുമതലയിലേക്ക് മടങ്ങുമെന്നാണ് സൂചന.
കേരളത്തില് പ്രവര്ത്തിക്കാനുള്ള താല്പര്യം അദേഹം കേന്ദ്ര നേതൃത്വത്തെ അറിയിച്ചിട്ടുണ്ട്. എന്നാല് പ്രവര്ത്തന മേഖല ദേശീയ തലത്തിലോ, കേരളത്തിലോയെന്ന കാര്യം പാര്ട്ടി വ്യക്തമാക്കിയിട്ടില്ല.
2024 ലാണ് മധ്യപ്രദേശില് നിന്നുള്ള രാജ്യസഭാംഗമായി ജോര്ജ് കുര്യനെ തിരഞ്ഞെടുത്തത്. കഴിഞ്ഞ നിയമസഭാ തിരഞ്ഞെടുപ്പില് കാഞ്ഞിരപ്പള്ളിയില് നിന്ന് മത്സരിച്ചെങ്കിലും തോറ്റു. ബിജെപി സംസ്ഥാന ഉപാധ്യക്ഷന്, ദേശീയ നിര്വാഹക സമിതിയംഗം, കോര് കമ്മിറ്റിയംഗം, പാര്ട്ടി വക്താവ് തുടങ്ങിയ നിലകളില് പ്രവര്ത്തിച്ചിരുന്നു.