കണ്ണൂര്: കാലവര്ഷം കനത്തതിനെത്തുടര്ന്ന് കണ്ണൂര്, കാസര്കോട് ജില്ലകളിലെ പ്രൊഫഷണല് കോളജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ജൂലൈ ഒന്ന് ബുധനാഴ്ച ജില്ലാ കളക്ടര്മാര് അവധി പ്രഖ്യാപിച്ചു. കേന്ദ്ര കാലാവസ്ഥാ വകുപ്പ് ഇരു ജില്ലകളിലും അതിശക്തമായ മഴ മുന്നറിയിപ്പായ ഓറഞ്ച് അലര്ട്ട് പ്രഖ്യാപിച്ച പശ്ചാത്തലത്തില് മുന് കരുതല് നടപടിയെന്ന നിലയിലാണ് തീരുമാനം.
അവധി ബാധകമാകുന്ന സ്ഥാപനങ്ങളും പ്രധാന നിര്ദേശങ്ങളും
പ്രൊഫഷണല് കോളജുകള്, സാധാരണ കോളജുകള്, സ്കൂളുകള്, അങ്കണവാടികള്, ട്യൂഷന് സെന്ററുകള്, മദ്രസകള് ഉള്പ്പെടെയുള്ള മത വിദ്യാഭ്യാസ സ്ഥാപനങ്ങള്. സി.ബി.എസ്.ഇ, ഐ.സി.എസ്.ഇ സ്കൂളുകള്ക്കും കേന്ദ്രീയ വിദ്യാലയങ്ങള്ക്കും അവധി ബാധകമായിരിക്കും. എന്നാല് റസിഡന്ഷ്യല് സ്കൂളുകള്ക്ക് അവധി ബാധകമല്ല. മുന്കൂട്ടി നിശ്ചയിച്ച സര്വകലാശാല പൊതു പരീക്ഷകള്ക്കും അഭിമുഖങ്ങള്ക്കും യാതൊരു മാറ്റവും ഉണ്ടായിരിക്കില്ല.
ജാഗ്രതാ നിര്ദേശം
തീവ്ര മഴ തുടരുന്ന സാഹചര്യത്തില് താഴ്ന്ന പ്രദേശങ്ങളിലും നദീതീരങ്ങളിലും താമസിക്കുന്നവര് ജാഗ്രത പാലിക്കണമെന്നും അനാവശ്യ യാത്രകള് ഒഴിവാക്കണമെന്നും ദുരന്തനിവാരണ അതോറിറ്റി അറിയിച്ചു.