തിരുവനന്തപുരം: ഹൈക്കോടതി വിധിക്ക് കാത്തു നില്ക്കാതെ ഉന്നത വിദ്യാഭ്യാസ മന്ത്രി കെ.ടി. ജലീല് രാജിവച്ചു. അല്പസമയം മുമ്പാണ് മുഖ്യമന്ത്രിക്ക് രാജിക്കത്ത് കൈമാറിയത്. മുഖ്യമന്ത്രിയുടെ നിര്ദേശത്തെ തുടര്ന്നാണ് രാജി. സിപിഎമ്മിന്റെ ഭാഗത്തു നിന്നും രാജി സമ്മര്ദ്ദമുണ്ടായിരുന്നു.
രാജിക്കത്ത് മുഖ്യമന്ത്രി ഗവര്ണര്ക്ക് കൈമാറി. ബന്ധു നിയമനക്കേസില് ജലീലിന് മന്ത്രി സ്ഥാനത്ത് തുടരാന് യോഗ്യതയില്ലെന്ന ലോകായുക്ത ഉത്തരവിനെതിരേ ഹൈക്കോടതിയില് നല്കിയ ഹര്ജി കോടതി പരിഗണിക്കുന്നതിനിടെയാണ് ജലീലിന്റെ രാജി.
സംസ്ഥാന ന്യൂനപക്ഷ വികസന കോര്പറേഷന് ജനറല് മാനേജരായി മന്ത്രി കെ.ടി ജലീല് ബന്ധു കെ.ടി അദീബിനെ നിയമിച്ചത് നിയമവിരുദ്ധമാണെന്നും മന്ത്രിസ്ഥാനത്ത് തുടരാന് ജലീല് യോഗ്യനല്ലെന്നുമായിരുന്നു ലോകായുക്ത ഉത്തരവ്. അബീദിന്റെ നിയമനത്തിനായി ജനറല് മാനേജറുടെ വിദ്യാഭ്യാസ യോഗ്യതയില് മാറ്റം വരുത്താന് ജലീല് ബന്ധപ്പെട്ടവര്ക്ക് അയച്ച കത്ത് കഴിഞ്ഞ ദിവസം പുറത്തായിരുന്നു.
മന്ത്രി പദവി സ്വകാര്യ താല്പര്യത്തിനായി ദുരുപയോഗം ചെയ്യുകയും പക്ഷപാതപരമായി പെരുമാറുകയും ചെയ്തു. ഇതിലൂടെ മന്ത്രി സത്യപ്രതിജ്ഞാ ലംഘനമാണ് നടത്തിയതെന്നുമാണ് ലോകായുക്ത കണ്ടെത്തിയത്. യൂത്ത് ലീഗ് നേതാവ് വി.കെ. മുഹമ്മദ് ഷാഫിയുടെ പരാതിയിലായിരുന്നു നടപടി. സൗത്ത് ഇന്ത്യന് ബാങ്കിലെ മാനേജര് പദവിയിലിരിക്കുമ്പോഴാണ് അദീബിനെ ഡപ്യൂട്ടേഷനില് ന്യൂനപക്ഷ വികസന കോര്പറേഷനില് നിയമിച്ചത്.