തൃശൂര്: പ്രശസ്ത ബാലസാഹിത്യകാരി സുമംഗല (88) അന്തരിച്ചു. വടക്കാഞ്ചേരിയിലെ മകന്റെ വസതിയില് വെച്ചായിരുന്നു അന്ത്യം. സുമംഗല എന്നത് തൂലികാ നാമമാണ്. ലീലാ നമ്പൂതിരിപ്പാട് എന്നാണ് യഥാര്ഥ പേര്.
ചെറുകഥകള്ക്കും നോവലുകള്ക്കും പുറമെ കുട്ടികള്ക്കുവേണ്ടി അന്പതോളം കഥകളും ലഘുനോവലുകളും രചിച്ച സുമംഗല ബാലസാഹിത്യത്തിലൂടെയാണ് കൂടുതല് പ്രശസ്തിയിലേക്ക് എത്തിയത്. 'നടന്ന് തീരാത്ത വഴികള്' എന്ന കൃതിക്ക് കേരള സാഹിത്യ അക്കാദമി പുരസ്കാരം ലഭിച്ചു. മിഠായിപ്പൊതി, പഞ്ചതന്ത്രം, മഞ്ചാടിക്കുരു എന്നിവയാണ് പ്രധാന കൃതികള്.
സംസ്കാരം നാളെ രാവിലെ 11ന് പാറമേക്കാവ് ശാന്തി ഘട്ടില് നടക്കും.
കുഞ്ഞുങ്ങളുടെ മനസറിഞ്ഞ് സാഹിത്യകൃതികള് ലളിതവും ശുദ്ധവുമായ ഭാഷയില് ഉറപ്പുവരുത്തുന്ന ഒരു ശൈലി അവര് എന്നും എഴുത്തില് നിലനിര്ത്തിയിരുന്നതായി മുഖ്യമന്ത്രി പിണറായി വിജയന് അനുസ്മരിച്ചു.
ധാരാളം പുരാണ കൃതികളെ കുട്ടികള്ക്ക് പരിചയപ്പെടുത്തിയിട്ടുള്ള സുമംഗലയുടെ വിയോഗം മലയാള ബാലസാഹിത്യത്തിന് വലിയ നഷ്ടമാണെന്നും മുഖ്യമന്ത്രി കൂട്ടിച്ചേര്ത്തു.