തിരുവനന്തപുരം: സംസ്ഥാനത്ത് രണ്ടാം ഡോസ് വാക്സിന് എടുക്കാനുള്ള പുതിയ മാര്ഗ്ഗനിര്ദ്ദേശങ്ങള് പുറത്ത് വിട്ട് ആരോഗ്യവകുപ്പ്. എല്ലാവര്ക്കും മുന്ഗണനയനുസരിച്ച് നല്കിത്തീര്ക്കുമെന്ന് ആരോഗ്യ വകുപ്പ് മന്ത്രി കെ.കെ.ശൈലജ ടീച്ചര് അറിയിച്ചു. വാക്സിനേഷന് സെന്ററുകളില് സെഷന് ഷെഡ്യൂള് ചെയ്യുമ്പോള് രണ്ടാമത്തെ ഡോസ് എടുക്കുന്നവര്ക്ക് മുന്ഗണന നല്കുന്നതാണ്. ഇതിനായി കോവിഡ് വാക്സിനേഷന് കേന്ദ്രങ്ങളില് വന്ന് തിരക്ക് കൂട്ടേണ്ടതില്ലെന്നും മന്ത്രി പറഞ്ഞു.
രണ്ടാം ഡോസ് കോവിഷീല്ഡ് വാക്സിന് 6 മുതല് 8 ആഴ്ചയ്ക്കുള്ളിലും കോവാക്സിന് 4 മുതല് 6 ആഴ്ചയ്ക്കുള്ളിലുമാണ് എടുക്കേണ്ടത്. ഓരോ വാക്സിനേഷന് സെന്ററുകളിലും രണ്ടാമത്തെ ഡോസ് വാക്സിന് എടുക്കുവാന് അര്ഹതയുള്ളവരുടെ ലിസ്റ്റ് കോവിന് പോര്ട്ടലില് ലഭ്യമാകും. ഇതനുസരിച്ച് വാക്സിനേഷന് സെന്ററുകളിലെ മാനേജര്മാര് ആശ പ്രവര്ത്തകരുടെയും തദ്ദേശ ഭരണ സ്ഥാപനങ്ങളുടെയും സഹായത്തോടെ ഇവരെ അറിയിക്കുന്നതാണെന്നും മന്ത്രി വ്യക്തമാക്കി.