തൃശൂര്: കൊടകര കുഴല്പ്പണ കവര്ച്ച കേസില് റിമാന്ഡില് കഴിയുന്ന പ്രതികളെ പൊലീസ് കസ്റ്റഡിയില് വാങ്ങും. ഒരു പ്രതിയുടെ വീട്ടില് നിന്ന് തന്നെ പരാതിയില് പറയുന്നതിനേക്കാള് കൂടുതല് തുക കണ്ടെത്തിയ സാഹചര്യത്തിലാണ് അന്വേഷണ സംഘത്തിന്റെ നീക്കം.
റിമാന്ഡില് കഴിയുന്ന എട്ട് പ്രതികളെയും തിങ്കളാഴ്ച കസ്റ്റഡിയില് വാങ്ങിയ ശേഷം വീണ്ടും ചോദ്യം ചെയ്യാനാണ് അന്വേഷണ സംഘത്തിന്റെ നീക്കം. കേസിലെ ഒന്പതാം പ്രതിയായ ബാബുവിന്റെ വീട്ടില് നിന്ന് മാത്രം കണ്ടെത്തിയത് 23 ലക്ഷം രൂപയും സ്വര്ണാഭരണങ്ങളും ആറ് ലക്ഷം രൂപയുടെ വായ്പാ തിരിച്ചടവ് രസീതുമായിരുന്നു. പരാതിക്കാരനായ ഷംജീറിന്റെ മൊഴി നഷ്ടപ്പെട്ടത് 25 ലക്ഷം രൂപയാണെന്നായിരുന്നു. എന്നാല് അതിനേക്കാളധികം തുക ഒരു പ്രതിയുടെ വീട്ടില് നിന്ന് മാത്രം കണ്ടെടുത്ത സാഹചര്യത്തില് കാറില് കൂടുതല് പണമുണ്ടായിരുന്നുവെന്ന് വ്യക്തമായി. ഇത് സംബന്ധിച്ച കൂടുതല് വിവരങ്ങള് ശേഖരിക്കാനാണ് പ്രതികളെ കസ്റ്റഡിയില് വാങ്ങുന്നത്.