റൊണാൾഡീഞ്ഞോക്ക് ഗോൾഡൻ വിസാ ലഭിച്ചു

ദുബായ്: മുൻ ബ്രസീലിയൻ ഫുട്ബോൾ താരം റൊണാൾഡീഞ്ഞോക്ക് യുഎഇ- ഗോൾഡൻ വീസ അനുവദിച്ചു. പത്തുവർഷത്തെ വിസയാണ് അനുവദിച്ചത്. ലോകത്തിലെ ഏറ്റവും മികച്ച മധ്യനിര ഫുട്ബോൾ താരങ്ങളിൽ ഒരാളായിരുന്നു റൊണാൾഡീഞ്ഞോ. ബ്രസീലിയൻ ക്ലബായ ഗ്രെമിയോയിലൂടെ കരിയർ തുടങ്ങിയ താരം പിഎസ്ജി, ബാർസിലോന, എസി മിലാൻ തുടങ്ങിയ ക്ലബുകൾക്കു വേണ്ടി കളിച്ചു. ചാംപ്യൻസ് ലീഗ് ഉൾപ്പെടെയുള്ള ക്ലബ് കിരീടങ്ങൾ നേടി. 

ബ്രസീലിന്റെ 2002 ലോകകപ്പ് നേട്ടത്തിൽ പ്രധാന പങ്കു വഹിച്ചു. ക്വാർട്ടർ ഫൈനലിൽ ഇംഗ്ലണ്ടിനെതിരെ കരിയില കിക്കിലൂടെ നേടിയ ഗോൾ ലോകകപ്പ് ചരിത്രത്തിലെ തന്നെ മികച്ച ഗോളുകളിലൊന്നാണ്. 2005ൽ ലോക ഫുട്ബോളർക്കുള്ള ബലോൻ ദ് ഓർ പുരസ്കാരവും നേടി.  ബ്രസീലിനായി 101 മൽസരങ്ങളിൽ 35 ഗോളുകൾ നേടിയിട്ടുണ്ട്. 2015 കളി നിർത്തിയെങ്കിലും 2018 ലാണ് പ്രൊഫഷണൽ ഫുട്ബോൾ നിന്ന് റൊണാൾഡിഞ്ഞോ വിരമിക്കുന്നത്.

കഴിഞ്ഞ ദിവസം ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സിന്റെ മുഖ്യ കാര്യാലയമായ ജാഫ്ലിയ ഓഫീസിൽ എത്തിയ താരത്തെ- മേധാവി മേജർ ജനറൽ മുഹമ്മദ് അഹ്‌മദ്‌ അൽ മർറിയും,ഉപമേധാവി മേജർ ജനറൽ ഉബൈദ് ബിൻ സുറൂറും,മറ്റു ഉദ്യോഗസ്ഥരും ചേർന്ന് സ്വീകരിച്ചു. മേജർ ജനറൽ അൽ മർറി പത്തുവർഷത്തെ ഗോൾഡൻ വിസ അടിച്ച പാസ്പോർട്ട് താരത്തിന് കൈമാറി.

യു എ ഇ യിൽ 10 വർഷത്തേക്ക് അനുവദിക്കുന്ന ഗോൾഡൻ വിസാ കൂടുതൽ മേഖലയിലേക്ക് വ്യാപിക്കാനുള്ള മന്ത്രിസഭായോഗ തീരുമാനത്തിന്റെ ഭാഗമായിട്ടാണ് പ്രമുഖ വ്യക്തികൾക്ക് ഇത്തരത്തിലുള്ള വിസാ അനുവദിക്കുന്നത്. വിവിധ വിഭാഗങ്ങളിൽപെട്ടവർ സമൂഹത്തിന് നൽകിയ സമഗ്രസംഭാവനകൾ പരിഗണിച്ചാണ് യു എ ഇ വീസാ നൽകുന്നത്.
ക്രിസ്റ്റ്യാനോ റൊണാൾഡോ, ഫിഗോ, പോൾ പോഗ്ബ, റോബർട്ടോ കാർലോസ്, റൊമാലു ലുകാകു, ഡിഡിയർ ഡ്രോഗ്ബ മിറാലെം പിജാനിക്, ലോക ഒന്നാം നമ്പർ ടെന്നീസ് കളിക്കാരൻ നൊവാക് ജോക്കോവിച്ച്, കാമറൂൺ ഫുട്ബോൾ താരം സാമുവൽ എറ്റോ തുടങ്ങിയവർക്കെല്ലാം മുൻപ് യുഎഇ ഗോൾഡൻ റെസിഡൻസി അനുവദിച്ചിരുന്നു.