അബുദാബി: മാളുകളിലേക്കുളള പ്രവേശനമുള്‍പ്പടെ ആഘോഷവേളകളിലും പൊതുപരിപാടികളിലും പങ്കെടുക്കണമെങ്കില്‍ അബുദാബി എമിറേറ്റിലുളളവർക്ക് നാളെ മുതല്‍ അല്‍ ഹോസന്‍ ആപ്പില്‍ പച്ച തെളിയണം. കോവിഡ് സുരക്ഷ മുന്‍കരുതല്‍ നടപടിയാണ് ഇത്.
ഷോപ്പിംഗ് മാളുകള്‍, സൂപ്പർമാർക്കറ്റുകൾ, ഹോട്ടലുകള്‍, പൊതുപാർക്കുകളും, ബീച്ചുകളും,റസ്റ്ററന്റ്, കഫെ, മറ്റ് വിനോദകേന്ദ്രങ്ങൾ എന്നിവിടങ്ങളിലേക്കെല്ലാം പ്രവേശിക്കാന്‍ അല്‍ ഹോസന്‍ ആപ്പില്‍ പച്ചനിറം തെളിയണം. 16 വയസിന് മുകളിലുളളവർക്കാണ് ഇത് ബാധകമാകുക. വാക്സിനെടുത്തവർക്കുള്‍പ്പടെ കോവിഡ് പിസിആർ പരിശോധന നടത്തിയാലാണ് അല്‍ ഹോസന്‍ ആപ്പില്‍ പച്ച നിറം തെളിയുക.
ലുലുവില്‍ പ്രവേശിക്കാനും പച്ചനിറം തെളിയണം
ഗ്രീന്‍ പാസ് പ്രോട്ടോക്കോള്‍ ലുലുവിന്റെ എല്ലാ മാളുകളിലും ഹൈപ്പർമാർക്കറ്റുകളിലും സജീവമായി നടപ്പിലാക്കുമെന്ന് ലുലു ഗ്രൂപ്പ്. അധികൃതരുടെ കോവിഡ് മുന്‍കരുതലുകളെല്ലാം പാലിച്ചുകൊണ്ടാണ് ലുലു സ്ഥാപനങ്ങള്‍ പ്രവർത്തിക്കുന്നത്. അബുദാബിയില്‍ ഗ്രീന്‍ പാസ് പ്രോട്ടോക്കോളിനോട് അനുബന്ധിച്ച് അല്‍ ഹോസന്‍ ആപ്പില്‍ പച്ചനിറമുളളവർക്കുമാത്രമായിരിക്കും മാളുകളിലും ഹൈപ്പർമാർക്കറ്റുകളിലും പ്രവേശനം അനുവദിക്കുക. കാലതാമസമില്ലാതെ, ഉപഭോക്താക്കള്‍ക്ക് ബുദ്ധിമുട്ടുണ്ടാക്കാതെ പ്രവേശന കവാടത്തില്‍ അല്‍ ഹോസന്‍ ആപ്പിലെ പച്ചനിറം പരിശോധിക്കാന്‍ സുരക്ഷാ ടീമിന് പരിശീലനം നല്‍കിയിട്ടുണ്ടെന്നും ലുലു ഗ്രൂപ്പ് മാർക്കറ്റിംഗ് ആന്റ് കമ്മ്യൂണിക്കേഷന്‍ ഡയറക്ടർ വി നന്ദകുമാർ വാർത്താകുറിപ്പില്‍ അറിയിച്ചു.
അതോടൊപ്പം തന്നെ മാള്‍ പരിസരത്ത് തന്നെ വിവിധ ആരോഗ്യ കേന്ദ്രങ്ങളുമായി സഹകരിച്ച് ഉപഭോക്താക്കള്‍ക്ക് സൗജന്യമായി പിസിആർ നടത്തുന്നതുമായി ബന്ധപ്പെട്ടുളള ആലോചനകളുണ്ടെന്നും അദ്ദേഹം അറിയിച്ചു.
അല്‍ ഹോസന്‍ ആപ്പില്‍ പച്ചതെളിയണമെങ്കില്‍
1.വാക്സിനെടുത്തവർ
വാക്സിന്റെ രണ്ട് ഡോസും സ്വീകരിച്ച് 28 ദിവസം കഴിഞ്ഞവർ- പിസിആർ ടെസ്റ്റെടുത്ത് നെഗറ്റീവെങ്കില്‍ അല്‍ ഹോസന്‍ ആപ്പില്‍ പച്ചനിറം തെളിയും,ഇതിന് 30 ദിവസമാണ് കാലാവധി. പിസിആർ ടെസ്റ്റെടുത്ത് നെഗറ്റീവാണെങ്കില്‍ എലിജിബിലിറ്റി വ്യക്തമാക്കുന്ന ഇ എന്നതോ സ്വർണനിറമുളള നക്ഷത്ര ചിഹ്നമോ തെളിയും. ഇതിന് ഏഴുദിവസമാണ് കാലാവധി.
2. വാക്സിന്റെ രണ്ടാം ഡോസ് കിട്ടിയവർ പക്ഷെ 28 ദിവസമാകാത്തവർ
പിസിആർ ടെസ്റ്റെടുത്താല്‍ 14 ദിവസം കാലാവധിയുളള പച്ച നിറം തെളിയും
3. ആദ്യ ഡോസ് കിട്ടി രണ്ടാം ഡോസിനായി കാത്തിരിക്കുന്നവർ
പിസിആർ ടെസ്റ്റെടുത്ത് നെഗറ്റീവെങ്കില്‍ ഏഴുദിവസം കാലാവധിയുളള പച്ചനിറം തെളിയും
4. രണ്ടാം ഡോസ് കിട്ടാന്‍ വൈകുന്നവർ
പിസിആർ ടെസ്റ്റെടുത്ത് നെഗറ്റീവെങ്കില്‍ 3 ദിവസം കാലാവധിയുളള പച്ചനിറം തെളിയും. വാക്സിന്റെ രണ്ടാം ഡോസെടുക്കുന്നതിനുളള അപ്പോയിന്റ്മെന്റ് 48 മണിക്കൂറിനേക്കാള്‍ വൈകിയവർക്കാണ് ഇത് ബാധകമാവുക
5.വാക്സിനെടുക്കുന്നതില്‍ നിന്ന് ഒഴിവാക്കപ്പെട്ടവർ
പിസിആർ ടെസ്റ്റെടുത്ത് നെഗറ്റീവെങ്കില്‍ ഏഴുദിവസം കാലാവധിയുളള പച്ചനിറം തെളിയും (വാക്സിനെടുക്കുന്നതില്‍ നിന്ന് ഒഴിവാക്കപ്പെട്ടവരാണെന്ന് ബോധ്യപ്പെടുത്തുന്ന സ‍ർട്ടിഫിക്കറ്റുകള്‍ അനിവാര്യം)
6.വാക്സിനെടുക്കാത്തവർ
പിസിആർ ടെസ്റ്റെടുത്ത് നെഗറ്റീവെങ്കില്‍ 3 ദിവസം കാലാവധിയുളള പച്ചനിറം തെളിയും.
ഈ ആറുവിഭാഗങ്ങളിലും പിസിആർ ടെസ്റ്റിന്റെ കാലാവധി അവസാനിച്ചാല്‍ പച്ചനിറം സ്വഭാവികമായും ഗ്രെ കളറിലേക്ക് മാറും. കോവിഡ് പോസിറ്റീവാണെങ്കില്‍ ചുവപ്പ് നിറത്തിലേക്കും മാറും.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.