ഷാർജ നിക്ഷേപ വികസന അതോറിറ്റിക്ക് പുതിയ നേതൃത്വം; ആക്റ്റിങ് സിഇഒ ആയി അഹമ്മദ് ഉബൈദ് അൽ ഖസീർ

ഷാർജ: വികസന പ്രവർത്തനങ്ങൾക്കു ചുക്കാൻ പിടിക്കുന്ന ഷാർജ നിക്ഷേപ വികസന അതോറിറ്റിയുടെ (ഷുറൂഖ്) പുതിയ മേധാവിയായി അഹമ്മദ് ഉബൈദ് അൽ ഖസീറിനെ നിയമിച്ചു.

ലോകോത്തര നിലവാരത്തിലുള്ള പുതിയ പദ്ധതികൾ വികസിപ്പിക്കുന്നതിനും വിദേശനിക്ഷേപങ്ങൾ ആകർഷിക്കുന്നതിലുമുള്ള ഷുറൂഖിന്റെ ശ്രമങ്ങൾ ആക്റ്റിങ് ചീഫ് എക്സിക്യൂട്ടിവ് ഓഫിസറായി നിയമിക്കപ്പെട്ട അഹമ്മദ് അൽ ഖസീറിന്റെ നേതൃത്വത്തിൽ തുടരും. 

ഷുറൂഖിന്റെ കീഴിൽ ഷാർജയിലുടനീളമുള്ള വിനോദസഞ്ചാര കേന്ദ്രങ്ങളുടെയും ചരിത്രകേന്ദ്രങ്ങളുടെയും മറ്റ് മേഖലകളിലെ പദ്ധതികളുടെയും പ്രവർത്തനങ്ങൾ മേൽനോട്ട ഉത്തരവാദിത്വവും അദ്ദേഹം നിർവഹിക്കും.

2006ൽ അൽ ഖസ്ബ ഡവലപ്മെന്റ് വിഭാഗത്തിൽ ബിസിനസ് ഡെവലപ്‌മെന്റ് മാനേജരായി ഷാർജയിലെ വികസനപ്രവർത്തനങ്ങളുടെ ഭാ​ഗമായ അദ്ദേഹത്തിന് 2008ൽ ഡയറക്ടറായി സ്ഥാനക്കയറ്റം ലഭിച്ചു. യുഎഇയിലെ പ്രധാന വിനോദകേന്ദ്രങ്ങളിലൊന്നായ അൽ ഖസ്ബയെ ഇന്നു കാണുന്ന വിധം ജനപ്രിയ വിനോദസഞ്ചാര കേന്ദ്രമാക്കി മാറ്റിയ സംഘത്തിന് നേതൃത്വം കൊടുത്തു.

വികസനപ്രവർത്തനങ്ങൾക്ക് ആക്കം കൂട്ടാനും കൂടുതൽ മേഖലകളിലേക്ക് വളരാനുമായി ഷാർജ ഭരണാധികാരിയുടെ പ്രത്യേക നിർദ്ദേശപ്രകാരം 2009ൽ ഷാർജ നിക്ഷേപവികസന അതോറിറ്റി (ഷുറൂഖ്) സ്ഥാപിതമായപ്പോൾ അതിന്റെ ഭാഗമായ അഹ്മദ് അൽ ഖസീർ, 2011 തൊട്ട് ഷുറൂഖിന്റെ ചീഫ് ഓപറേറ്റിങ് ഓഫിസറായി സേവനമനുഷ്ടിച്ചുവരികയായിരുന്നു.

മേഖലയിലെ ഒരു പ്രധാന നിക്ഷേപ-വിനോദസഞ്ചാര-വികസന കേന്ദ്രമായി ഷാർജയെ വളർത്തുന്നതിലും, അതിനു സഹായകരമായ പദ്ധതികളും രാജ്യാന്തര പങ്കാളിത്തവും ഷുറൂഖിന്റെ പ്രവർത്തനങ്ങളിലൂടെ ഉറപ്പുവരുത്തുന്നതിലും നിർണായക പങ്കുവഹിച്ചവരിൽ ഒരാളാണ് അഹ്മദ് അൽ ഖസീർ.