പരിശുദ്ധ ദൈവമാതാവിന്റെ വണക്കമാസം | മെയ് 13 | പതിമൂന്നാം ദിവസം

“യാക്കോബ്, മറിയത്തിന്റെ ഭർത്താവായ ജോസഫിന്റെ പിതാവായിരുന്നു. അവളിൽ നിന്നു ക്രിസ്തു എന്നു വിളിക്കപ്പെടുന്ന യേശു ജനിച്ചു.”
(മത്തായി 1:16)

ദൈവമാതാവിന്റെ അതിശ്രേഷ്ഠ മാതൃത്വം
 മാതൃത്വം മനുഷ്യജീവിതത്തിലെ ഏറ്റവും വിശുദ്ധവും മഹത്തരവുമായ അനുഗ്രഹങ്ങളിലൊന്നാണ്. എന്നാൽ അതിനുമപ്പുറം നിലകൊള്ളുന്നതാണ് ദൈവമാതൃത്വം. പരിശുദ്ധ കന്യാമറിയത്തെ തിരുസഭ നിരവധി വിശിഷ്ട നാമങ്ങളാൽ ആദരിച്ചാലും, അവയിൽ ഏറ്റവും മഹിമയുള്ളത് “ദൈവമാതാവ്” എന്ന വിശേഷണമാണ്. മറിയത്തിന്റെ എല്ലാ മഹത്വത്തിന്റെയും അടിസ്ഥാനം അവളുടെ ദൈവമാതൃത്വമാണ്.
ദൈവപുത്രനായ യേശുക്രിസ്തുവിനെ ലോകത്തിന് നൽകുവാൻ ദൈവം തിരഞ്ഞെടുത്ത പരിശുദ്ധ കന്യക, മനുഷ്യബുദ്ധിക്ക് അതീതമായ മഹത്വത്തിലേക്കാണ് ഉയർത്തപ്പെട്ടത്. അവളുടെ സ്ഥാനവും മഹിമയും വാക്കുകൾക്കതീതമാണ്.
വിശുദ്ധ ബൊനവെന്തുരയുടെ വാക്കുകൾ ഏറെ പ്രസക്തമാണ്:
“ദൈവത്തിന് കൂടുതൽ മഹത്വമുള്ള സ്വർഗ്ഗത്തെയും കൂടുതൽ മനോഹരമായ സൃഷ്ടികളെയും സൃഷ്ടിക്കുവാൻ കഴിയും. എന്നാൽ ദൈവമാതാവിനെക്കാൾ പരിപൂർണ്ണയായ ഒരു മാതാവിനെ സൃഷ്ടിക്കുക സാധ്യമല്ല.”
ദൈവം മനുഷ്യർക്കു നൽകിയ ഏറ്റവും വലിയ അനുഗ്രഹങ്ങളിൽ ഒന്നാണ് ദൈവമാതൃത്വം. മറിയത്തിന്റെ അമലോത്ഭവവും നിത്യകന്യാത്വവും ഉൾപ്പെടെ അവൾക്കു ലഭിച്ച എല്ലാ പ്രത്യേക കൃപകളും ഈ മഹത്തായ ദൗത്യത്തോടു ചേർന്നതാണ്.
ദൈവമാതൃത്വം ക്രിസ്തീയ വിശ്വാസത്തിന്റെ അടിസ്ഥാന സത്യങ്ങളിലൊന്നാണ്. മറിയത്തെ ദൈവമാതാവായി അംഗീകരിക്കാതെയെങ്കിൽ ക്രിസ്തുവിന്റെ അവതാര രഹസ്യം പൂർണ്ണമായി മനസ്സിലാക്കുവാൻ സാധിക്കുകയില്ല. കാരണം, മനുഷ്യസ്വഭാവം സ്വീകരിച്ച ദൈവപുത്രനെയാണ് മറിയം പ്രസവിച്ചത്.
മറ്റു മാതാക്കളെപ്പോലെ മറിയവും തന്റെ ശിശുവിന് മനുഷ്യത്വമാണ് നൽകിയതെങ്കിലും, ആ മനുഷ്യത്വം സ്വീകരിച്ചത് ദൈവിക വ്യക്തിയായ യേശുക്രിസ്തുവാണ്. അതുകൊണ്ടുതന്നെ മറിയം യഥാർത്ഥ അർത്ഥത്തിൽ ദൈവമാതാവാണ്.
അവൾ ദൈവസുതനെ തന്റെ ഉദരത്തിൽ ഒമ്പത് മാസം സംവഹിക്കുകയും, സ്വന്തം സ്നേഹത്താലും കരുതലാലും വളർത്തുകയും ചെയ്തു. അതിനാൽ യേശുക്രിസ്തു അവളുടെ മാംസത്തിന്റെ മാംസവും രക്തത്തിന്റെ രക്തവുമാണെന്ന് പറയുന്നത് വിശ്വാസത്തിന്റെ ആഴമുള്ള സത്യമാണ്.

സംഭവം

ഹെൻറി ഗ്വനിയർ (Henry Guiner) എന്ന പണ്ഡിതൻ ലൂർദ്ദിൽ നടന്ന അത്ഭുതങ്ങളെക്കുറിച്ച് ഇപ്രകാരം സാക്ഷ്യപ്പെടുത്തുന്നു:
“വർഷങ്ങളോളം ലൂർദ്ദിലെ ഗ്രോട്ടോയുടെ സമീപത്ത് ഞാൻ താമസിക്കുകയും ആയിരക്കണക്കിന് തീർത്ഥാടകരെയും രോഗികളെയും കാണുകയും ചെയ്തു. ആദ്യകാലങ്ങളിൽ ഞാൻ അവിശ്വാസിയായിരുന്നു. പല അത്ഭുതങ്ങളെയും ഞാൻ അവഗണിച്ചു. എന്നാൽ ആവർത്തിച്ച് നടന്ന രോഗശാന്തികളും എതിർക്കാനാവാത്ത തെളിവുകളും എന്റെ മനസ്സിനെ ആഴത്തിൽ സ്പർശിച്ചു.
അവസാനം ഞാൻ സത്യം അംഗീകരിച്ചു. പരിശുദ്ധ അമ്മയുടെ മാധ്യസ്ഥത്തിലൂടെ ലൂർദ്ദിൽ അനേകം അത്ഭുതങ്ങൾ സംഭവിച്ചിട്ടുണ്ടെന്ന് ഞാൻ ഉറച്ച വിശ്വാസത്തോടെ പ്രഖ്യാപിക്കുന്നു.”

പ്രാർത്ഥന

ദൈവമേ, പരിശുദ്ധ കന്യകയെ അങ്ങയുടെ മാതാവായി തിരഞ്ഞെടുത്ത് മഹത്വപ്പെടുത്തിയതിനായി ഞങ്ങൾ അങ്ങേക്കു നന്ദി പറയുന്നു.
ദൈവജനനിയേ, സർവ്വ സൃഷ്ടികളിലും ഉന്നതയായ അമ്മേ, ഞങ്ങളുടെ ജീവിതം വിശുദ്ധിയിലേക്കു നയിക്കണമേ. അങ്ങയുടെ വിനയവും അനുസരണവും സ്നേഹവും അനുകരിച്ച് ജീവിക്കുവാൻ ഞങ്ങൾക്കു കൃപ നല്കേണമേ.
ആദ്ധ്യാത്മികവും ഭൗതികവുമായ എല്ലാ ആവശ്യങ്ങളിലും ഞങ്ങളെയും ഞങ്ങളുടെ കുടുംബങ്ങളെയും അനുഗ്രഹിക്കണമേ. ലോകസമാധാനത്തിനും മനുഷ്യരുടെ മാനസാന്തരത്തിനും തിരുസഭയുടെ വിജയത്തിനുമായി ഞങ്ങൾ പ്രാർത്ഥിക്കുന്നു.
ആമ്മേൻ.

വിശുദ്ധ ബർണ്ണർദോസിന്റെ ജപം

എത്രയും ദയയുള്ള മാതാവേ!
നിന്‍റെ സങ്കേതത്തിൽ അഭയം തേടിയെത്തിയവരിൽ ഒരുവനെയും നീ കൈവിട്ടിട്ടില്ലെന്ന് ലോകം സാക്ഷ്യപ്പെടുത്തുന്നു. ആ വിശ്വാസത്തോടെ ഞാൻ നിന്‍റെ തിരുമുമ്പിൽ എത്തുന്നു.
പാപിയായ ഞാൻ കണ്ണുനീരോടെ നിന്‍റെ കരുണയെ അപേക്ഷിക്കുന്നു. അവതരിച്ച വചനത്തിന്‍റെ മാതാവേ, എന്‍റെ പ്രാർത്ഥന ദയാപൂർവ്വം കേട്ടരുളേണമേ.
ആമ്മേനീശോ.
ജന്മപാപമില്ലാതെ ഉദ്ഭവിച്ച ശുദ്ധ മറിയമേ,
പാപികളുടെ സങ്കേതമേ,
ഞങ്ങൾക്കായി നിന്‍റെ തിരുക്കുമാരനോടു പ്രാർത്ഥിച്ചുകൊള്ളണമേ.

• 1 സ്വർഗ്ഗം
• 1 നന്മ
•  1 ത്രിത്വം

(മൂന്നു പ്രാവശ്യം ചൊല്ലുക)