ടെൽ അവീവ്: ഇറാന്റെ ആക്രമണത്തിന് മറുപടിയായി ടെഹ്റാനിലും ഇസ്ഫഹാനിലും ഇസ്രയേൽ സൈനിക ആക്രമണം നടത്തി. ഏപ്രിൽ എട്ടിന് നിലവിൽ വന്ന വെടിനിർത്തൽ കരാറിനു ശേഷം ഇരു രാജ്യങ്ങളും തമ്മിൽ നേരിട്ട് നടക്കുന്ന ആദ്യ സൈനിക ഏറ്റുമുട്ടലാണിത്.
പടിഞ്ഞാറൻ, മധ്യ ഇറാനിലെ സൈനിക ലക്ഷ്യങ്ങൾക്ക് നേരെ ആക്രമണം നടത്തിയതായി ഇസ്രയേൽ അറിയിച്ചു. ഇറാനിയൻ ഭരണകൂടത്തിന്റെ സൈനിക ലക്ഷ്യങ്ങൾക്ക് നേരെയാണ് വ്യോമസേന ആക്രമണം നടത്തിയതെന്ന് ഇസ്രയേൽ വ്യക്തമാക്കി. ആൾനാശത്തെക്കുറിച്ചോ ആക്രമണം നടന്ന കൃത്യമായ സ്ഥലത്തെക്കുറിച്ചോ ഉള്ള കൂടുതൽ വിവരങ്ങൾ ഒന്നും തന്നെ ലഭ്യമാക്കിയിട്ടില്ല.
സംഘർഷം ഒഴിവാക്കാൻ അമേരിക്ക ആവശ്യപ്പെട്ടെങ്കിലും അത് മുഖവിലയ്ക്കെടുക്കാതെ ഇസ്രയേൽ ആക്രമണവുമായി മുന്നോട്ട് പോകുകയായിരുന്നു. സംഘർഷം നയതന്ത്ര ചർച്ചകളിലൂടെ പരിഹരിക്കണമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ നിർദേശം ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു തള്ളുകയായിരുന്നു.
ഈ നടപടിയോടെ യുഎസ്-ഇറാൻ സമാധാന ചർച്ചകൾ വീണ്ടും അനിശ്ചിതത്വത്തിലായിരിക്കുകയാണ്. ബെയ്റൂട്ടിൽ ഇസ്രയേൽ നടത്തിയ ആക്രമണത്തിന് തങ്ങളുടെ ഭാഗത്തു നിന്നുള്ള യാതൊരുവിധ അനുമതിയും ഉണ്ടായിരുന്നില്ലെന്ന് യുഎസ് ഉദ്യോഗസ്ഥരും വ്യക്തമാക്കി.
ആക്രമണത്തെ തുടർന്ന് ഇറാൻ തങ്ങളുടെ പടിഞ്ഞാറൻ വ്യോമാതിർത്തി അടച്ചതായും റിപ്പോർട്ടുകളുണ്ട്. മേഖലയിൽ സൈനിക സംഘർഷം രൂക്ഷമാകുന്നതിൽ അന്താരാഷ്ട്ര സമൂഹം ആശങ്കയിലാണ്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.