ന്യുഡല്ഹി: പതിനെട്ട് വയസ് കഴിഞ്ഞ എല്ലാവര്ക്കും കരുതല് ഡോസ് അഥവാ മൂന്നാം ഡോസ് വാക്സീന് നല്കാന് കേന്ദ്ര സര്ക്കാര് തീരുമാനം. ഏപ്രില് പത്ത് ഞായറാഴ്ച മുതല് രാജ്യത്തെ എല്ലാ സ്വകാര്യ വാക്സിനേഷന് കേന്ദ്രങ്ങള് വഴിയും കരുതല് ഡോസ് സ്വീകരിക്കാം. ആദ്യ രണ്ട് ഡോസ് വാക്സിന് പോലെ ബൂസ്റ്റര് ഡോസ് സൗജന്യമായിരിക്കില്ല.
സ്വകാര്യ വാക്സിനേഷന് കേന്ദ്രങ്ങള് വഴിയാണ് വാക്സിനേഷന് എന്നതിനാല് പണം നല്കേണ്ടി വരും. രണ്ടാം ഡോസ് വാക്സിന് എടുത്ത് ഒന്പത് മാസം പൂര്ത്തിയായ ശേഷം മാത്രമേ ബൂസ്റ്റര് ഡോസ് സ്വീകരിക്കാന് അനുമതിയുള്ളൂ. അതേസമയം സര്ക്കാര് ആരോഗ്യ കേന്ദ്രങ്ങള് വഴിയുള്ള ഒന്ന്, രണ്ട് ഡോസ് വാക്സീനേഷനും മുതിര്ന്ന പൗരന്മാര്ക്കും ആരോഗ്യ പ്രവര്ത്തകര്ക്കും മുന്നിര കോവിഡ് പോരാളികള്ക്കും നല്കുന്ന ബൂസ്റ്റര് ഡോസ് വാക്സിനേഷനും തുടരും.
മൂന്നാം ഡോസ് നിര്ബന്ധമാക്കിയ വിദേശ രാജ്യങ്ങളിലേക്ക് യാത്ര ചെയ്യേണ്ടി വരുന്നവര്ക്ക് ബൂസ്റ്റര് ഡോസിനുള്ള അനുമതി ആശ്വാസമാകും. ചൈനയടക്കം വിവിധ രാജ്യങ്ങളില് കോവിഡ് വ്യാപനം തുടരുന്ന സാഹചര്യത്തില് ഇന്ത്യയിലും ബൂസ്റ്റര് ഡോസ് വിതരണം ചെയ്യണമെന്ന് ഒരു വിഭാഗം ആരോഗ്യവിദഗ്ദര് ആവശ്യപ്പെട്ടിരുന്നു.