മുംബൈ: അസാനി ചുഴലിക്കാറ്റിന്റെ ഭാഗമായി ആന്ധ്രയുടെ തീരമേഖലയില് ശക്തമായ മഴ തുടങ്ങി. വിശാഖപട്ടണം, വിജയവാഡ വിമാനത്താവളങ്ങളില് നിന്ന് കൂടുതല് സര്വ്വീസുകള് റദ്ദാക്കി. വിശാഖപട്ടണം വഴിയുള്ള നിരവധി ട്രെയിന് സര്വ്വീസുകളും തല്ക്കാലികമായി വെട്ടിചുരുക്കി.
ആന്ധ്ര തീരത്ത് എത്തുന്ന അസാനി ചുഴലിക്കാറ്റ് ദിശ മാറി മാറി യാനം, കാക്കിനട, വിശാഖപട്ടണം തീരം വഴി മധ്യ പടിഞ്ഞാറന് ബംഗാള് ഉള്കടലില് പ്രവേശിക്കും. ആന്ധ്ര തീരത്തിന് സമീപമെത്തുന്നത് മുതല് അസാനിയുടെ ശക്തി കുറയും. അടുത്ത 24 മണിക്കൂറില് തീവ്ര ന്യൂനമര്ദമായി മാറും. ആന്ധ്രയുടെ വടക്കന് തീര മേഖലയില് ശക്തമായ മഴയുണ്ട്. ആന്ധ്രയിലെ അഞ്ച് ജില്ലകളില് റെഡ് അലേര്ട്ട് പ്രഖ്യാപിച്ചു.
ഒഡീഷയിലും പശ്ചിമ ബംഗാളിന്റെ തീരമേഖലയിലും മുന്നറിയിപ്പുണ്ട്. വിശാഖപട്ടണം, വിജയവാഡ വിമാനത്താവളങ്ങളില് നിന്ന് വിമാന സര്വ്വീസുകള് തല്ക്കാലത്തേക്ക് റദ്ദാക്കി. ആന്ധ്ര തീരത്ത് മണിക്കൂറില് 75 മുതല് 95 കിലോമീറ്റര് വരെ വേഗതയില് കാറ്റ് വീശുമെന്നാണ് മുന്നറിയിപ്പ്. ദേശീയ ദുരന്ത നിവാരണ സേനയേയും നാവികസേനയേയും ദുരന്തസാധ്യതാ മേഖലകളില് വിന്യസിച്ചിട്ടുണ്ട്.