കൊല്ക്കത്ത: ബോളിവുഡ് പിന്നണി ഗായകന് കെ.കെ എന്ന കൃഷ്ണകുമാര് കുന്നത്തിന്റെ മരണത്തില് അസ്വാഭാവിക മരണത്തിന് പൊലീസ് കേസെടുത്തു. കൊല്ക്കത്തയിലെ എസ്.എസ്.കെ.എം ആശുപത്രിയില് പോസ്റ്റ്മോര്ട്ട നടപടികള് തുടരുകയാണെന്നാണ് റിപ്പോര്ട്ടുകള്.
കെ.കെയുടെ മുഖത്തും തലയിലും മുറിവേറ്റ പാടുകളുണ്ടായിരുന്നുവെന്ന് പൊലീസിനെ ഉദ്ധരിച്ച് ദേശീയ മാധ്യമങ്ങള് റിപ്പോര്ട്ട് ചെയ്തു.
കഴിഞ്ഞ ദിവസം കൊല്ക്കത്തയില് സംഗീത പരിപാടിയ്ക്ക് ശേഷം മടങ്ങിയെത്തിയ കെ.കെ ഗ്രാന്ഡ് ഹോട്ടലില് കുഴഞ്ഞു വീഴുകയായിരുന്നു. പിന്നാലെ അദ്ദേഹത്തെ ഉടന് കൊല്ക്കട്ട മെഡിക്കല് റിസര്ച്ച് ഇന്സ്റ്റിറ്റ്യൂട്ടില് എത്തിച്ചെങ്കിലും അന്ത്യം സംഭവിച്ചു. മരണകാരണം ഹൃദയാഘാതമാണെന്നാണ് പ്രാഥമിക നിഗമനം. അവസാന പരിപാടിയുടെ ചിത്രങ്ങള് ഇന്സ്റ്റഗ്രാമില് അദ്ദേഹം പോസ്റ്റ് ചെയ്തിരുന്നു.
കൊല്ക്കത്തയിലെ പരിപാടിയുടെ സംഘാടകരുടേയും ഹോട്ടല് ജീവനക്കാരുടേയും മൊഴി പൊലീസ് ഇന്ന് രേഖപ്പെടുത്തും.