ന്യൂഡല്ഹി: ബിജെപി വക്താക്കള് ചാനല് ചര്ച്ചയില് പ്രവാചകനെ നിന്ദിച്ചെന്ന ആരോപണത്തില് ഇസ്ലാമിക രാജ്യങ്ങളുടെ അതൃപ്തി പരിഹരിക്കാന് അനുനയ നീക്കങ്ങളുമായി കേന്ദ്ര സര്ക്കാര്. അറബ് രാജ്യങ്ങളുടെ അതൃപ്തി പരിഹരിക്കാന് പ്രധാനമന്ത്രി നരേന്ദ്ര മോഡി നേരിട്ട് ഇടപെട്ടേക്കും. വിഷയം തുടര്ന്നാല് പ്രധാനമന്ത്രി നരേന്ദ്ര മോഡി സുഹൃദ് രാജ്യങ്ങളുമായി സംസാരിച്ചേക്കും എന്നാണ് സൂചന.
ഗള്ഫ് രാജ്യങ്ങളിലെ തെറ്റിദ്ധാരണ നീക്കാന് നടപടിക്ക് നിര്ദ്ദേശം നല്കിയിട്ടുണ്ട്. വിദേശകാര്യമന്ത്രി സ്ഥിതി നിരീക്ഷിക്കുകയാണ്. പ്രശ്നത്തില് ഇടപെട്ടത് വൈകിയെന്നാണ് മന്ത്രാലയത്തിന്റെ വിലയിരുത്തല്. അതിനിടെ, വിഷയത്തില് ഇന്ത്യ പരസ്യമായി ക്ഷമാപണം നടത്തണമെന്ന് ഖത്തറും കുവൈറ്റും ആവശ്യപ്പെട്ടു. ലിബിയയും സംഭവത്തില് അപലപിച്ചു.
ആഗോള തലത്തിലുള്ള ലക്ഷകണക്കിന് വരുന്ന ഇസ്ലാം വിശ്വാസികളില് പരാമാര്ശം വേദനയുണ്ടാക്കിയ പശ്ചാത്തലത്തില് കേന്ദ്ര സര്ക്കാര് പരസ്യമായി ക്ഷണാപണം നടത്തുമെന്ന് പ്രതീക്ഷിക്കുന്നതായി ഖത്തര് ചൂണ്ടിക്കാട്ടി. വിദേശകാര്യമന്ത്രി സഹമന്ത്രി സുല്ത്താന് ബിന് സാദ് അല് മുറൈഖി ഇന്ത്യന് സ്ഥാനപതി ഡോ. ദീപക് മിത്തലിന് കൈമാറിയ ഔദ്യോഗിക കത്തിലാണ് ഈ ആവശ്യം ഉന്നയിച്ചത്.