ഉദയ്പൂര്: ഉദയ്പൂര് കൊലപാതകവുമായി ബന്ധപ്പെട്ട് ഏഴ് പൊലീസ് സ്റ്റേഷന് അതിര്ത്തികളില് കര്ഫ്യൂ പ്രഖ്യാപിച്ചു. തയ്യല്ക്കാരനായ കനയ്യലാലിനെ കൊലപ്പെടുത്തിയ രണ്ട് പേരെ രാജസ്ഥാന് പൊലീസ് ഇന്നലെ രാജസമന്തയില് നിന്ന് അറസ്റ്റ് ചെയ്തിരുന്നു. ഇവരെ സംബന്ധിച്ചുള്ള കൂടുതല് വിവരങ്ങള് എന്ഐഎ ശേഖരിക്കും.
കേന്ദ്ര ആഭ്യന്തര മന്ത്രാലയത്തിന്റെ നിര്ദ്ദേശ പ്രകാരം എന്ഐഎ പ്രത്യേക സംഘം ഉദയ്പൂരില് എത്തി. ഇന്ന് സംഭവ സ്ഥലം സന്ദര്ശിക്കും. കൊലപാതകത്തിന് പിന്നില് ഭീകരവാദസംഘടനകള്ക്ക് പങ്കുണ്ടെന്നാണ് കേന്ദ്രം കരുതുന്നത്. ഇതിന്റെ ഭാഗമായിട്ടാണ് പരിശോധന.
രാജസ്ഥാനില് ഇന്റര്നെറ്റ് നിരോധനം തുടരും. നബി വിരുദ്ധ പരാമര്ശം നടത്തിയ ബിജെപി മുന് ദേശീയ വക്താവ് നൂപുര് ശര്മയെ പിന്തുണച്ച് സാമൂഹ്യ മാധ്യമത്തില് പോസ്റ്റിട്ടതിനാണ് കനയ്യലാലിനെ രണ്ട് പേര് ചേര്ന്ന് വെട്ടിക്കൊന്നത്.
കൊലപാതകത്തിന് പിന്നാലെയുണ്ടായ സംഘര്ഷ സാഹചര്യം കണക്കിലെടുത്ത് സംസ്ഥാനത്ത് കനത്ത ജാഗ്രത തുടരുകയാണ്. ഇന്നലെ ഉദയ്പൂരില് നടന്ന പ്രതിഷേധത്തിന് പിന്നാലെയുണ്ടായ സംഘര്ഷത്തില് നിരവധി വാഹനങ്ങള്ക്ക് പ്രതിഷേധക്കാര് തീയിട്ടുരുന്നു. കല്ലേറില് പൊലീസുകാര്ക്കും പരുക്കേറ്റിട്ടുണ്ട്.
ജനങ്ങള് സമാധാനം പാലിക്കണമെന്ന് രാജസ്ഥാന് മുഖ്യമന്ത്രി അശോക് ഗെലോട്ട് അഭ്യര്ത്ഥിച്ചു. കുറ്റക്കാര്ക്കെതിരെ കര്ശന നടപടിയുണ്ടാകുമെന്നും മുഖ്യമന്ത്രി വ്യക്തമാക്കി.