മുംബൈ: മഹാരാഷ്ട്രയില് ഇന്ന് സ്പീക്കര് തെരഞ്ഞെടുപ്പ് നടക്കും. ബിജെപിയുടെ രാഹുല് നര്വേക്കറും ശിവസേനയുടെ രാജന് സാല്വിയും തമ്മിലാണ് പോരാട്ടം.
പുതിയ ഭരണപക്ഷവും പ്രതിപക്ഷവും തമ്മിലുള്ള ആദ്യ ബല പരീക്ഷണമാണ് ഇന്ന് നടക്കാന് പോകുന്നത്. അതേസമയം ഗോവയിലെ റിസോര്ട്ടിലായിരുന്ന ശിവസേന വിമത എംഎല്എമാര് മുംബൈയില് തിരിച്ചെത്തി. ഗോവയില് നിന്ന് വിമാന മാര്ഗമാണ് എംഎല്എമാര് കഴിഞ്ഞ ദിവസം രാത്രിയോടെ മുംബൈയില് എത്തിയത്.
മുംബൈയിലെ താജ് പ്രസിഡന്റ് ഹോട്ടലിലേക്കാണ് എംഎല്എമാര് എത്തിയിരിക്കുന്നത്. ബിജെപി എംഎല്എമാരും ഇതേ ഹോട്ടലിലാണ് താമസം. നിയമസഭയിലേക്ക് ഇരു കൂട്ടരും രാവിലെ ഇവിടെ നിന്ന് പുറപ്പെടും എന്നാണ് വിവരം.
അതിനിടെ വിമത നീക്കം നടത്തിയ ഏകനാഥ് ഷിന്ഡേയെ ശിവസേന പാര്ട്ടി പദവികളില് നിന്ന് നീക്കി. പാര്ട്ടി വിരുധ പ്രവര്ത്തനം നടത്തുകയും സ്വയം അംഗത്വം ഉപേക്ഷിക്കുകയും ചെയ്തതിനാലാണ് നടപടിയെന്ന് ഷിന്ഡേയ്ക്കെഴുതിയ കത്തില് ഉദ്ദവ് താക്കറെ പറഞ്ഞു. വിമത നീക്കം തുടങ്ങിയതിന് തൊട്ട് പിന്നാലെ നിയമസഭാ കക്ഷി നേതൃ സ്ഥാനവും ഷിന്ഡേയില് നിന്ന് എടുത്ത് മാറ്റിയിരുന്നു.