മംഗളൂരു: യുവമോര്ച്ച നേതാവ് പ്രവീണ് നെട്ടാരെയുടെ കൊലപാതകത്തില് രണ്ട് പോപ്പുലര് ഫ്രണ്ട് പ്രവര്ത്തകര് അറസ്റ്റില്. സുള്ള്യ സ്വദേശികളായ ഷാക്കിര്, മുഹമ്മദ് ഷെരീഫ് എന്നിവരാണ് അറസ്റ്റിലായത്.
കേരള അതിര്ത്തിയായ വെള്ളാരയില് നിന്നാണ് ഇവരെ പൊലീസ് പിടികൂടിയത്.
പ്രതികള് കേരളത്തിലേക്ക് കടന്ന വിവരം ലഭിച്ചതിന്റെ അടിസ്ഥാനത്തില് അന്വേഷണം സംഘം കേരളത്തിലേക്ക് തിരിച്ചിരുന്നു. പ്രതികള് സഞ്ചരിച്ചെന്ന കരുതുന്ന ബൈക്ക് പൊലീസ് കസ്റ്റഡിയില് എടുത്തിരുന്നു.
യുവമോര്ച്ച പ്രവര്ത്തകന്റെ കൊലപാതകത്തിന് പിന്നാലെയുണ്ടായ സംഘര്ഷങ്ങളുടെ പശ്ചാത്തലത്തില് ദക്ഷിണ കന്നഡയില് അതീവ ജാഗ്രത തുടരുകയാണ്. സുള്ള്യ, പുത്തൂര്, കഡബ താലൂക്കുകളില് നിരോധനാജ്ഞ പ്രഖ്യാപിച്ചു. പ്രതിഷേധ സാധ്യത കണക്കിലെടുത്ത് പ്രദേശത്ത് കൂടുതല് പൊലീസിനെ വിന്യസിച്ചിരിക്കുകയാണ്.
ചൊവ്വാഴ്ച രാത്രി ബിജെപി യുവമോര്ച്ച പ്രവര്ത്തകനായ പ്രവീണ് (32) ദക്ഷിണ കന്നഡ ജില്ലയിലെ ബെല്ലാരെയില് വെച്ച് കൊല്ലപ്പെടുന്നത്. കട അടച്ച് വീട്ടിലേക്ക് മടങ്ങാന് ശ്രമിക്കുന്നതിനിടെ ബൈക്കിലെത്തിയ അക്രമി സംഘം പ്രവീണിനെ വെട്ടിക്കൊലപ്പെടുത്തുകയായിരുന്നു. പോപ്പുലര് ഫ്രണ്ട്, എസ്ഡിപിഐ പ്രവര്ത്തകരാണ് കൊലപാതകത്തിന് പിന്നിലെന്നാണ് ബിജെപി ആരോപിക്കുന്നത്.
അതിനിടെ കൊലപാതക കേസില് അന്വേഷണം ഊര്ജിതമല്ലെന്ന് പാര്ട്ടിക്കുള്ളില് ആക്ഷേപം ശക്തമാണ്. പ്രതികളെ എത്രയും പെട്ടെന്ന് അറസ്റ്റുചെയ്തില്ലെങ്കില് രാജിവയ്ക്കുമെന്ന് യുവമേര്ച്ചയിലെ ചില നേതാക്കള് പാര്ട്ടി കേന്ദ്രങ്ങള്ക്ക് മുന്നറിയിപ്പ് നല്കിയിരുന്നു.