ന്യൂഡല്ഹി: കോണ്ഗ്രസ് പ്രസിഡന്റ് തിരഞ്ഞെടുപ്പ് ഒക്ടോബര് 17ന് നടക്കും. വോട്ടെണ്ണല് 19നും ഉണ്ടായിരിക്കും. ഞായറാഴ്ച ചേര്ന്ന കോണ്ഗ്രസ് പ്രവര്ത്തക സമിതി യോഗമാണ് തിരഞ്ഞെടുപ്പ് തീയതികള് നിശ്ചയിച്ചത്. തിരഞ്ഞെടുപ്പ് പ്രഖ്യാപനം സെപ്റ്റംബര് 22ന് നടത്തും.
നാമനിര്ദ്ദേശ പത്രിക 24 മുതല് 30 വരെ സമര്പ്പിക്കാം. തിരഞ്ഞെടുപ്പ് ആവശ്യമായി വന്നാല് ഒക്ടോബര് 17ന് നടത്തും. ഇടക്കാല അധ്യക്ഷ സോണിയാ ഗാന്ധി, രാഹുല്, പ്രിയങ്ക എന്നിവര് ഓണ്ലൈനിലൂടെയാണ് പ്രവര്ത്തക സമിതി യോഗത്തില് പങ്കെടുത്തത്.
നേതൃത്വത്തിനെതിരെ വിമര്ശനമുന്നയിച്ച് രംഗത്തെത്തിയ ജി-23 നേതാക്കളില് ഉള്പ്പെടുന്ന ആനന്ദ് ശര്മ അടക്കമുള്ളവര് ഞായറാഴ്ച ചേര്ന്ന കോണ്ഗ്രസ് പ്രവര്ത്തക സമിതി യോഗത്തില് പങ്കെടുത്തു. മുന് പ്രധാനമന്ത്രി മന്മോഹന് സിങ്, മധുസൂദന് മിസ്ത്രി, കെ.സി വേണുഗോപാല്, ജയ്റാം രമേശ്, മുകുള് വാസ്നിക്, പി. ചിദംബരം, അശോക് ഗെലോട്ട്, ഭൂപേഷ് ഭാഘേല് തുടങ്ങിയവര് പ്രവര്ത്തക സമിതിയില് പങ്കെടുത്തു.