ലക്നൗ: മുസാഫര്നഗര് കലാപക്കേസില് ബിജെപി നിയമസഭാംഗം വിക്രം സൈനിക്കും മറ്റ് 11 പേര്ക്കും രണ്ട് വര്ഷം തടവ് ശിക്ഷ വിധിച്ചു.
പ്രത്യേക എംപി/എംഎല്എ കോടതി ജഡ്ജി ഗോപാല് ഉപാധ്യായയുടേതാണ് വിധി. ഇവര്ക്ക് 10,000 രൂപ വീതം പിഴയും വിധിച്ചു.
2013 ല് നടന്ന കേസില് മറ്റ് 15 പ്രതികളെ തെളിവുകളുടെ അഭാവത്തില് കോടതി വെറുതെ വിട്ടിരുന്നു.
ഉത്തര്പ്രദേശിലെ ഖതൗലിയില് നിന്നുള്ള ബിജെപി എംഎല്എയായ സൈനിയെയും മറ്റുള്ളവരെയും കസ്റ്റഡിയിലെടുക്കുകയും പിന്നീട് 25,000 രൂപ വീതമുള്ള രണ്ട് ആള് ജാമ്യത്തില് വിടുകയും ചെയ്തു. ശിക്ഷയ്ക്കെതിരെ ഇവര് ഹൈക്കോടതിയില് അപ്പീല് നല്കി. ഐപിസി സെക്ഷന് 336 (മറ്റുള്ളവരുടെ ജീവനോ വ്യക്തി സുരക്ഷയോ അപകടപ്പെടുത്തുന്ന പ്രവൃത്തി), 353 (പൊതു ഉദ്യോഗസ്ഥനെ തന്റെ കടമ നിര്വഹിക്കുന്നതില് നിന്ന് പിന്തിരിപ്പിക്കാന് ആക്രമണം അല്ലെങ്കില് ക്രിമിനല് ബലപ്രയോഗം നടത്തുന്നത്), 147 (കലാപം), 148 (മാരകായുധങ്ങളുമായി കലാപം നടത്തല്), 149 (നിയമവിരുദ്ധമായ സമ്മേളനം) എന്നീ വകുപ്പുകളാണ് ഇവര്ക്കെതിരെ ചുമത്തിയിരിക്കുന്നത്.
കൂടാതെ വിക്രം സൈനിക്കെതിരെ ദേശീയ സുരക്ഷാ നിയമപ്രകാരവും കേസെടുത്തിട്ടുണ്ട്.