ന്യൂഡല്ഹി: രാജ്യത്ത് ജനുവരി പകുതിയോടെ കോവിഡ് കേസുകള് ഉയര്ന്നേക്കുമെന്ന് കേന്ദ്രത്തിന്റെ മുന്നറിയിപ്പ്. കഴിഞ്ഞ വ്യാപനങ്ങളുടെ അടിസ്ഥാനത്തിലാണ് കേന്ദ്രം മുന്നറിയിപ്പ് നല്കിയിരിക്കുന്നത്. അടുത്ത 40 ദിവസം നിര്ണായകമാണ്.
കഴിഞ്ഞ രണ്ടു ദിവസത്തിനിടെ വിദേശത്ത് നിന്ന് രാജ്യത്ത് എത്തിയ യാത്രക്കാരില് 39 പേര്ക്ക് കോവിഡ് സ്ഥിരീകരിച്ചതായി സര്ക്കാര് കണക്കുകള് വ്യക്തമാക്കുന്നു. ചൈനയില് പടര്ന്നുപിടിക്കുന്ന ഒമിക്രോണ് ഉപവകഭേദം ഇന്ത്യയിലും സ്ഥിരീകരിച്ച സാഹചര്യത്തില് രാജ്യത്ത് നിരീക്ഷണം ശക്തമാക്കിയിട്ടുണ്ട്.
അടുത്തിടെ വിദേശത്ത് നിന്ന് വിമാനത്താവളത്തില് എത്തിയ യാത്രക്കാരില് നിന്ന് 6000 പേരെ പരിശോധനയ്ക്ക് വിധേയമാക്കിയതായും സര്ക്കാര് കണക്കുകള് വ്യക്തമാക്കുന്നു. കോവിഡ് സ്ഥിതിഗതികള് വിലയിരുത്താന് വ്യാഴാഴ്ച ഡല്ഹി ഇന്ദിരാഗാന്ധി രാജ്യാന്തര വിമാനത്താവളം കേന്ദ്ര ആരോഗ്യമന്ത്രി മന്സൂഖ് മാണ്ഡവ്യ സന്ദര്ശിക്കും.