ദുബായ്: എമിറേറ്റില്‍ കഴിഞ്ഞ വർഷത്തെ അപേക്ഷിച്ച് കുറ്റകൃത്യങ്ങള്‍ കുറഞ്ഞുവെന്ന് ദുബായ് പൊലീസ് കുറ്റാന്വേഷണ വിഭാഗമായ സിഐഡി വകുപ്പ് അറിയിച്ചു. 2022 നെ അപേക്ഷിച്ച് 63.2 ശതമാനത്തിന്‍റെ കുറവാണ് രേഖപ്പെടുത്തിയിരിക്കുന്നതെന്ന്ദു ബായ് പോലീസിലെ കമാന്‍റർ ഇന്‍ ചീഫ് ലഫ്റ്റനന്‍റ് ജനറല്‍ അബ്ദുളള ഖലീഫ അല്‍ മറി പറഞ്ഞു. കുറ്റവാളികളെ കണ്ടെത്തുന്നതിനും കുറ്റകൃത്യങ്ങള്‍ തടയുന്നതിനും പോലീസ് നടത്തിയ പ്രവർത്തനങ്ങളാണ് വിജയം കണ്ടതെന്ന് അദ്ദേഹം പറഞ്ഞു. സിഐഡി വിഭാഗം നടപ്പിലാക്കിയ എട്ട് പദ്ധതികളും മികവും പ്രതിബദ്ധതയുമുള്ള ഉദ്യോഗസ്ഥരും ഇക്കാര്യത്തിൽ സഹായകമായിട്ടുണ്ടെന്നും അദ്ദേഹം അറിയിച്ചു.
കഴിഞ്ഞവർഷം 442 കുറ്റവാളികളെ പിടികൂടാന്‍ കഴിഞ്ഞു. വിവിധ സർക്കാർ സ്ഥാപനങ്ങളുമായി ബന്ധപ്പെട്ട് 782 കേസുകൾ കൈകാര്യം ചെയ്യാനും സാധിച്ചിട്ടുണ്ടെന്ന് വാർഷിക അവലോകനത്തില്‍ വ്യക്തമാക്കുന്നു. കുറ്റകൃത്യങ്ങൾ തടയുന്നതിനും കുറ്റകൃത്യത്തിനു ശേഷമുള്ള നടപടിക്രമങ്ങൾ സുഗമമാക്കുന്നതിനും നൂതന സുരക്ഷാ പദ്ധതികളും വകുപ്പ് നടപ്പിലാക്കിയതും ഗുണമായി. ഗുണഭോക്താക്കൾക്ക് സാധനങ്ങൾ തിരികെ നൽകുകയും വാഹനങ്ങളിലും മറ്റുമായി മറന്നുവച്ച വിലപിടിപ്പുള്ള വസ്തുക്കൾ പോലീസിന് കൈമാറിയ സത്യസന്ധരായ 14 വ്യക്തികളെ പോലീസ് ആദരിക്കുകയും ചെയ്തു. ഹോസ്പിറ്റാലിറ്റി, വിനോദ മേഖലകളിൽ പ്രവർത്തിക്കുന്ന 4,085 ഗുണഭോക്താക്കൾക്കായി 55 ബോധവൽക്കരണ പ്രഭാഷണങ്ങൾ നടത്തി.