ന്യൂഡല്ഹി: സുരക്ഷാ സേനകളുടെ നിര്ദേശം പാലിച്ച് ജമ്മുവിലെ ചില മേഖലകളില് ഭാരത് ജോഡോ യാത്ര ബസിലാക്കാന് തീരുമാനം. യാത്രയില് ആളെ കുറയ്ക്കാനും സാധ്യതയുണ്ട്.
യാത്ര കടന്നുപോകുന്ന തന്ത്ര പ്രധാനമേഖലകളെല്ലാം നിരീക്ഷണത്തിലാണ്. രാഹുല് ഗാന്ധിയുടെ സുരക്ഷയില് ആശങ്കപ്പെടേണ്ടതില്ലെന്ന് ജമ്മുകശ്മീര് ഭരണകൂടം പ്രതികരിച്ചു. ജമ്മുകശ്മീരിലെ നര്വാര്ളില് കഴിഞ്ഞ ദിവസം മണിക്കൂറുകളുടെ വ്യത്യാസത്തില് രണ്ട് വാഹനങ്ങളില് സ്ഫോടനമുണ്ടായിരുന്നു.
അന്വേഷണം പ്രഖ്യാപിച്ചതിന് പിന്നാലെ എന്ഐഎ സംഘം സ്ഥലത്തെത്തി പരിശോധന നടത്തി. സമീപ പ്രദേശങ്ങളിലേക്കും പരിശോധന വ്യാപിപ്പിച്ചിട്ടുണ്ട്.
ജമ്മുകശ്മീര് പൊലീസിനേയും, കേന്ദ്ര പൊലീസിനെയും കൂടുതലായി വിന്യസിച്ചിട്ടുണ്ട്. ആഭ്യന്തര മന്ത്രാലയത്തിന്റെ നിര്ദ്ദേശ പ്രകാരം ജില്ലാ ഭരണകൂടം സാഹചര്യം നിരീക്ഷിക്കുന്നുണ്ട്. സ്ഫോടനം നടന്ന സ്ഥലത്ത് നിന്ന് ഏറെ ദൂരത്തിലാണ് ഭാരത് ജോഡോ യാത്ര പുരോഗമിക്കുന്നതെങ്കിലും രാഹുല് ഗാന്ധിയുടെ സുരക്ഷ കൂട്ടിയിട്ടുണ്ട്.
ഭാരത് ജോഡോ യാത്ര ഈ മാസം മുപ്പതിന് ജമ്മുകശ്മീരില് സമാപിക്കുമ്പോള് നടക്കുന്ന റാലിയില് പങ്കെടുക്കാനുള്ള കത്ത് 31 പ്രതിപക്ഷ പാര്ട്ടികള്ക്ക് കോണ്ഗ്രസ് അധ്യക്ഷന് മല്ലികാര്ജുന് ഖര്ഗെ നല്കിയിരുന്നു.