ന്യൂഡല്ഹി: ഡല്ഹിയിലും പരിസര പ്രദേശങ്ങളിലും ശക്തമായ ഭൂചലനം. ഇന്ന് രാത്രി 10.17 നാണ് ഏതാനും സെക്കന്ഡുകള് നീണ്ടു നിന്ന ഭൂചലനം അനുഭവപ്പെട്ടത്.
റിക്ടര് സ്കെയിലില് 6.6 തീവ്രത രേഖപ്പെടുത്തിയ ഭൂചലത്തെ തുടര്ന്ന് ആളുകള് കെട്ടിടങ്ങളില് നിന്ന് ഓടി പുറത്തിറങ്ങി ഒഴിഞ്ഞ സ്ഥലങ്ങളില് കൂടി നില്ക്കുകയാണ്. ഉത്തര്പ്രദേശ്, ഹിമാചല് പ്രദേശ്, ജമ്മു കശ്മീര്, പഞ്ചാബ് എന്നിവിടങ്ങളില് ഭൂചലനം അനുഭവപ്പെട്ടു.
കെട്ടിടങ്ങള്ക്ക് നാശനഷ്ടമുണ്ടായതായോ ആര്ക്കെങ്കിലും ജീവഹാനി സംഭവിച്ചതായോ ഇതുവരെ റിപ്പോര്ട്ടുകളില്ല. അഫ്ഗാനിസ്ഥാന്-താജിക്കിസ്ഥാന് അതിര്ത്തിയിലെ ഹിന്ദു കുഷ് ഏരിയയാണ് ഭൂചലനത്തിന്റെ പ്രഭവ കേന്ദ്രം.
അഫ്ഗാനിസ്ഥാന്, പാകിസ്ഥാന്, താജിക്കിസ്ഥാന്, ചൈന എന്നീ രാജ്യങ്ങളിലും പ്രകമ്പനം അനുഭവപ്പെട്ടതായാണ് റിപ്പോര്ട്ടുകള്.
തുടര് ചലനങ്ങള്ക്ക് ഇപ്പോള് സാധ്യതയുണ്ടെങ്കിലും പ്രവചിക്കാന് കഴിയില്ലെന്ന് നാഷണല് സെന്റര് ഫോര് സീസ്മോളജിയിലെ ശാസ്ത്രജ്ഞന് ജെ എല് ഗൗതം പറഞ്ഞു.