ന്യൂഡല്ഹി: കോണ്ഗ്രസ് നേതാവ് രാഹുല് ഗാന്ധി ഡല്ഹിയിലെ വീടൊഴിയുന്നു. അയോഗ്യനാക്കിയ കോടതി നടപടിക്ക് പിന്നാലെയാണ് നീക്കം.19 വര്ഷമായി 12 തുഗ്ലക്ക് ലൈനിലാണ് രാഹുല് ഗാന്ധി താമസിക്കുന്നത്. ഡല്ഹിയിലെ തുഗ്ലക് ലൈനിലെ വസതിയില് നിന്ന് സാധനങ്ങള് മാറ്റി.
ലോക്സഭയില് നിന്ന് അയോഗ്യനാക്കപ്പെട്ടതിനെ തുടര്ന്ന് വീടൊഴിയണമെന്നുള്ള നോട്ടീസിനോട്, വീട് ഒഴിയുമെന്നായിരുന്നു രാഹുല് നല്കിയ മറുപടി. നോട്ടീസില് പറഞ്ഞിട്ടുള്ള കാര്യങ്ങള് ഉറപ്പായും പാലിക്കുമെന്ന് ലോക്സഭ സെക്രട്ടറിയേറ്റ് ഡെപ്യൂട്ടി സെക്രട്ടറി ഡോ. മോഹിത് രാജന് എഴുതിയ കത്തില് രാഹുല് വ്യക്തമാക്കി.
കഴിഞ്ഞ നാല് തവണ ലോക്സഭയിലേക്ക് തിരഞ്ഞെടുക്കപ്പെട്ട അംഗമെന്ന നിലയില് അവിടെ ചെലവഴിച്ച സമയത്തിന്റെ സന്തോഷകരമായ ഓര്മ്മകള്ക്ക് ജനങ്ങളോട് കടപ്പെട്ടിരിക്കുന്നുവെന്നും രാഹുല് കുറിച്ചു. ലോക്സഭ ഹൗസിംഗ് കമ്മിറ്റിയാണ് രാഹുലിന് നോട്ടീസ് അയച്ചത്.
മാര്ച്ച് 23 നാണ് രാഹുല് ഗാന്ധിയെ ലോക്സഭാംഗത്വത്തില് നിന്ന് അയോഗ്യനാക്കിയത്. ഒരു മാസത്തിനുള്ളില് വീടൊഴിയണമെന്നാണ് നിര്ദേശിച്ചിരുന്നത്. 2004 ല് ആദ്യം എംപിയായത് മുതല് രാഹുല് ഗാന്ധി താമസിക്കുന്നത് തുഗ്ലക് ലൈനിലെ പന്ത്രണ്ടാം നമ്പര് വസതിയിലാണ്. ജനങ്ങളുടെ വിധിയെഴുത്തനുസരിച്ചാണ് ഈ വസതിയില് കഴിഞ്ഞതെന്നും സന്തോഷപൂര്ണമായ ഓര്മ്മകളാണ് തനിക്കുള്ളതെന്നും രാഹുല് നല്കിയ മറുപടിയിലുണ്ട്.