ദോഹ: ഖത്തർ എയർവെയ്‌സ് ദോഹയിൽ നിന്നും മനാമയിലേക്ക് നേരിട്ടുള്ള സർവീസ് തുടങ്ങുന്നു. ഖത്തറിനും ബഹ്റൈനുമിടയിൽ വിമാന സർവീസുകൾ ഉടൻ പുനരാരംഭിക്കുമെന്ന പ്രഖ്യാപനത്തിന് പിന്നാലെയാണ് ഖത്തർ എയർവേസ് ടിക്കറ്റുകളുടെ ബുക്കിംഗ് ആരംഭിച്ചത്.
വരുന്ന വ്യാഴാഴ്ച (മെയ് 25 ) മുതല്‍ എല്ലാ ദിവസവും രാത്രി 8 മണിക്ക് ദോഹയില്‍ നിന്ന് വിമാനം പുറപ്പെടും. അതേ ദിവസം തന്നെ ബഹ്‌റൈനിൽ നിന്ന് ഖത്തറിലേക്ക് പുറപ്പെടുന്ന വിമാനം (ക്യുആർ 1109) രാത്രി 10:20 ന് പുറപ്പെട്ട് രാത്രി 11:15 ന് ദോഹയിലെത്തും. 50 മിനുട്ടാണ് യാത്രാ സമയം.
2017 ലെ ഉപരോധത്തിന് പിന്നാലെ ഇരു രാജ്യങ്ങൾക്കുമിടയിലെ വിമാന സർവീസുകൾ നിർത്തിവെച്ചിരുന്നു.എന്നാല്‍ സർവ്വീസുകള്‍ വീണ്ടും ആരംഭിക്കുന്നത് വ്യോമയാനമേഖലയില്‍ കരുത്തുപകരും.