ഡബ്ലിന്‍: ഇന്ത്യയുടെ പ്രിയാന്‍ഷ് കോമ്പൗണ്ട് ആര്‍ച്ചറിയില്‍ അണ്ടര്‍ 21 ലോക ചാമ്പ്യനായി. രാജ്യത്തിന്റെ മെഡല്‍ നേട്ടം അഞ്ച് സ്വര്‍ണമടക്കം ഒമ്പത് മെഡലുകളായി ഉയര്‍ന്നു.
അയര്‍ലണ്ടില്‍ നടന്നുകൊണ്ടിരിക്കുന്ന ലോക ആര്‍ച്ചറി യൂത്ത് ചാമ്പ്യന്‍ഷിപ്പില്‍ ഏകപക്ഷീയമായ അണ്ടര്‍ 21 പുരുഷന്മാരുടെ വ്യക്തിഗത ഫൈനലില്‍ പ്രിയാന്‍ഷ് 147-141 എന്ന സ്ലോവേനിയയുടെ അല്‍ജാസ് ബ്രെങ്കിനെ പരാജയപ്പെടുത്തി.
നേരത്തെ യു.എസ്.എയുടെ ലീന്‍ ഡ്രേക്കിനെ 142-136 എന്ന സ്‌കോറിന് പരാജയപ്പെടുത്തി അദിതി സ്വാമി അണ്ടര്‍ 18 വനിതാ കിരീടം നേടിയിരുന്നു. അണ്ടര്‍ 18 കോമ്പൗണ്ട് വനിതാ യോഗ്യതാ റെക്കോര്‍ഡ് തകര്‍ത്ത അദിതിക്ക് ഇപ്പോള്‍ നടന്നു കൊണ്ടിരിക്കുന്ന യൂത്ത് വേള്‍ഡ് ചാമ്പ്യന്‍ഷിപ്പില്‍ പങ്കെടുക്കാന്‍ സാധ്യതയേറി.