കൊച്ചി: എറണാകുളം ഉദയംപേരൂര്‍ ഇന്ത്യന്‍ ഓയില്‍ കോര്‍പ്പറേഷന്‍ ബോട്ട്ലിങ് പ്ലാന്റിലെ ലോഡിങ് തൊഴിലാളികള്‍ സമരത്തില്‍. ഇതേത്തുടര്‍ന്ന് ആറ് ജില്ലകളിലേക്കുള്ള എല്‍.പി.ജി വിതരണം മുടങ്ങി. ശമ്പളപ്രശ്നത്തെച്ചൊല്ലിയാണ് സമരം.
വ്യാഴാഴ്ച രാവിലെയാണ് സമരം ആരംഭിച്ചത്. ശമ്പളം വെട്ടിക്കുറച്ചു, ശമ്പളം ലഭിച്ചില്ല എന്നീ കാരണങ്ങള്‍ ചൂണ്ടിക്കാട്ടിയാണ് സമരം. എറണാകുളം, കോട്ടയം, ഇടുക്കി, തൃശൂര്‍, ആലപ്പുഴ, പത്തനംതിട്ട ജില്ലകളിലേക്കുള്ള എല്‍.പി.ജി സിലിണ്ടര്‍ വിതരണമാണ് നിലച്ചത്.
ലോഡിങ് തൊഴിലാളികള്‍ സമരത്തിനിറങ്ങിയതോടെ 180 ഓളം ലോറികള്‍ കുടുങ്ങിക്കിടക്കുകയാണ്. സമരം ഒത്തുതീര്‍പ്പായാല്‍ മാത്രമേ ലോഡ് കയറ്റുകയുള്ളൂ എന്നാണ് തൊഴിലാളികള്‍ അറിയിക്കുന്നത്. തൊഴിലാളികളുമായി ചര്‍ച്ച നടക്കുകയാണ്. സമരം നീണ്ടുപോയാല്‍ ഇന്ധനക്ഷാമത്തിലേക്ക് അടക്കം കാര്യങ്ങള്‍ നീങ്ങാന്‍ സാധ്യതയുണ്ട്.