മഴക്കാലം എന്നാല്‍ പലരുടെയും ചിന്തകളില്‍ നിറയുന്നത് ബാല്‍ക്കണിയില്‍ ഇരുന്ന് ഒരു ചൂടുള്ള ചായയ്‌ക്കൊപ്പം സ്വാദിഷ്ടമായ പരിപ്പുവട ആസ്വദിക്കുക എന്നതാവും. ഇതിനൊരു മറുവശം കൂടിയുണ്ട്. താല്‍പര്യമില്ലെങ്കിലും ആരോഗ്യം കണക്കിലെടുത്ത് മഴക്കാലത്തെ അണുബാധകളെക്കുറിച്ചും ആരോഗ്യപ്രശ്നങ്ങളെക്കുറിച്ചും നമ്മള്‍ ജാഗ്രത പുലര്‍ത്താന്‍ ശ്രമിക്കാറുണ്ട്. എങ്കിലും എത്രപേര്‍ മഴക്കാലങ്ങളില്‍ നമ്മുടെ അടുക്കളകളിലെ അണുബാധക്കളെക്കുറിച്ചും സുരക്ഷകളെക്കുറിച്ചും ചിന്തിക്കുന്നുണ്ട്?
വളരെക്കുറച്ച് ആളുകള്‍ മാത്രമായിരിക്കും ഈക്കാര്യത്തെക്കുറിച്ച് ഗൗരവപരമായി ചിന്തിക്കാറും പ്രവര്‍ത്തിക്കാറുമുള്ളത്. നമ്മുടെ ആരോഗ്യത്തിന്റെ അടിസ്ഥാനമായ ഭക്ഷണങ്ങള്‍ ഉണ്ടാക്കുന്നയിടം വളരെ പ്രാധാന്യമുള്ളതാണെന്ന് അറിയുക. വീടിന്റെ ഏറ്റവും പ്രധാനപ്പെട്ട സ്ഥലമാണ് അടുക്കള. അതിനാല്‍ അത് എല്ലായ്പ്പോഴും വൃത്തിയായും ശുചിയായി സൂക്ഷിക്കാന്‍ ശ്രദ്ധിക്കണം. ഈര്‍പ്പമുള്ള ഇടങ്ങളില്‍ പെട്ടെന്ന് അണുബാധയ്ക്ക് സാധ്യതയുണ്ട്. അതിനാല്‍ മഴക്കാലത്ത് അടുക്കളകള്‍ പ്രത്യേകം ശ്രദ്ധിക്കണം.
മഴക്കാലത്ത് ഫംഗസ് പടരാതിരിക്കാനും അനാവശ്യ പ്രാണികളും അണുക്കളും പടരാതിരിക്കാനും മഴക്കാലത്തിന് മുമ്പ് നമ്മുടെ അടുക്കളകള്‍ മണ്‍സൂണ്‍ പ്രൂഫ് (Monsoon Proof Kitchen) ആക്കുന്നതാണ് നല്ലത്. ചില ലളിതമായ നുറുങ്ങുകള്‍ കൊണ്ട് നമ്മുക്ക് മഴക്കാലത്ത് നമ്മുടെ അടുക്കളകള്‍ അണുവിമുക്തമായി സൂക്ഷിക്കാന്‍ സാധിക്കും. മണ്‍സൂണില്‍ നിങ്ങളുടെ അടുക്കള അണുവിമുക്തമായിരിക്കാനും മറ്റ് പല രീതിയിലും സുരക്ഷിതമായിരിക്കാനും പാലിക്കേണ്ട ജാഗ്രതകളും ഈര്‍പ്പരഹിതമായിരിക്കാനുമുള്ള ചില ടിപ്പുകളും ഇതാ.
1. വയറിങ്:
മഴക്കാലത്ത് നിങ്ങളുടെ അടുക്കളയുടെ സുരക്ഷ ഉറപ്പാക്കുന്നതിനായി സംരക്ഷിതവുമായ വയറിംഗ് അത്യാവശ്യമാണ്. സുരക്ഷ നല്‍കുന്നതും നല്ല നിലവാരമുള്ള വയര്‍ കണക്ഷനുകളും ഉപയോഗിക്കുക. മഴക്കാലം, വീടിന്റെ അടുക്കള ഭിത്തികളില്‍ ഈര്‍പ്പം ഉണ്ടാക്കുകയും അത് ഷോര്‍ട്ട് സര്‍ക്യൂട്ട് ഉള്‍പ്പടെയുള്ള വൈദ്യുതി സംബന്ധമായ അപകടങ്ങളിലേക്ക് നയിക്കുകയും ചെയ്യും. മഴക്കാലത്തിനുമുമ്പ് ഇലക്ട്രീഷ്യനെക്കൊണ്ട് വയറിങ് പരിശോധിച്ച് സുരക്ഷ ഉറപ്പാക്കുക.
2. ഉപരിതലങ്ങള്‍ വൃത്തിയുള്ളതും വരണ്ടതുമായി സൂക്ഷിക്കുക:
അടുക്കള ഈര്‍പ്പ രഹിതമായും വൃത്തിയുള്ളതുമായും സൂക്ഷിക്കുക. പ്രത്യേകിച്ച് മഴക്കാലത്ത്, എല്ലാ അണുക്കളും സീസണല്‍ പ്രാണികളെയും അകറ്റി നിര്‍ത്താന്‍ ഇത് അത്യാവശ്യമാണ്. മണ്‍സൂണ്‍ കാലം ഈര്‍പ്പമുള്ള തറയ്ക്കും പ്രതലത്തിനും കാരണമാകും. ഇത് പ്രാണികള്‍ക്ക് പെരുകാന്‍ പറ്റിയ സാഹചര്യം ഒരുക്കും. അതിനാല്‍ അടുക്കള എല്ലായ്പ്പോഴും വൃത്തിയായി സൂക്ഷിക്കാന്‍ അണുനാശിനി ഉപയോഗിക്കുക. നിങ്ങളുടെ അടുക്കള ഈര്‍പ്പരഹിതമായിരിക്കാന്‍ ഒരു ഫാന്‍ ഉപയോഗിക്കാം.
3. ജനാലകള്‍ പ്രധാനം:
വെന്റിലേഷന്‍ ഈര്‍പ്പത്തെ അകറ്റി നിര്‍ത്താനും ശുദ്ധവായു കടന്നു പോകാനും സഹായിക്കുന്നു. എല്ലാ സീസണുകളിലും ഇത് പ്രധാനമാണ്. എന്നാല്‍ മണ്‍സൂണില്‍ ജനാലകള്‍ കൂടുതല്‍ ഉപകാരപ്പെടും. മഴക്കാലത്ത് തറകളിലും ഭിത്തികളിലും ഒരു ദുര്‍ഗന്ധം ഉണ്ടാകാം. അത് അത്ര സുഖകരമല്ലാത്തതായിരിക്കും. ഈ ഭാഗങ്ങളില്‍ നല്ല വായുസഞ്ചാരം ഒരുക്കുക എന്നതാണ് ഈ ദുര്‍ഗന്ധം ഒഴിവാക്കാനുള്ള ഏറ്റവും നല്ല മാര്‍ഗം.
4. നവീകരണം ഒഴിവാക്കുക:
മണ്‍സൂണ്‍ സീസണില്‍ നിങ്ങളുടെ വീടോ അടുക്കളയോ പുതുക്കിപ്പണിയുന്നത് മികച്ച തീരുമാനമായിരിക്കില്ല. കാരണം നനഞ്ഞ ഭിത്തികള്‍ക്ക് ഈര്‍പ്പം വര്‍ധിപ്പിക്കാനും പല ബുദ്ധിമുട്ടുകള്‍ സൃഷ്ടിക്കാനും കഴിയും. ഇത് നിങ്ങളുടെ വീടിനും ഭിത്തികള്‍ക്കും ഒക്കെ കേടുപാടുകള്‍ വരുത്തും. അതുകൊണ്ട് ഈ സമയത്ത് നവീകരണ പ്രവര്‍ത്തനങ്ങള്‍ ഒഴിവാക്കുന്നതാണ് നല്ലത്.
5. ചോര്‍ച്ച പരിശോധിക്കുക:
അടുക്കളയില്‍ വെള്ളക്കെട്ടുകളുടെ ആവശ്യമില്ലല്ലോ അല്ലേ? അതിനാല്‍ എല്ലാ ലീക്കേജുകളും ഡ്രെയിനുകളും ഒരു പ്ലംബറിന്റെ സഹായത്തോടെ പരിശോധിക്കുന്നത് നല്ലതാണ്. മഴയത്ത് ഈ പൈപ്പുകള്‍ക്ക് മാത്രമല്ല വീടുകള്‍ക്കും ചെറിയ ചോര്‍ച്ചകള്‍ ഉണ്ടാകാം. അത് പഹിഹരിച്ചില്ലെങ്കില്‍ വലിയ ബുദ്ധിമുട്ടുകള്‍ക്ക് കാരണമാകും.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.