തിരുവനന്തപുരം: മാധ്യമപ്രവര്ത്തകന് എസ് വി പ്രദീപിന്റെ അപകടമരണത്തിന് കാരണമായ ലോറി കസ്റ്റഡിയിലെടുത്തു . ഡ്രൈവർ ജോയി അറസ്റ്റിൽ. ഈഞ്ചക്കല് നിന്നാണ് ലോറി പിടികൂടിയത്. വെളളായണിയില് ലോഡ് ഇറക്കാന് പോകുമ്പോഴാണ് അപകടമെന്ന് ഡ്രൈവര് പറഞ്ഞു. മരണത്തില് കൊലക്കുറ്റം ചുമത്തിയാണ് പൊലീസ് കേസെടുത്തത്.
ലോറിയേയും ഡ്രൈവറേയും ഈഞ്ചക്കലില് നിന്നാണ് ഫോര്ട്ട് എ.സി പ്രതാപന്റെ നേതൃത്വത്തിലുള്ള സംഘം കസ്ററഡിയിലെടുത്തത്. ഭയം കാരണമാണ് വാഹനം നിര്ത്താതെ പോയതെന്നാണ് പൊലീസിനു ജോയി നല്കിയമൊഴി. ഇയാളെകുറിച്ച് വിശദമായി അന്വേഷണം നടത്തുന്നുണ്ടെന്നു ഫോര്ട്ട് എ.സി പറഞ്ഞു. അതേസമയം സംഭവത്തിലെ ദുരൂഹത അന്വേഷിക്കണമെന്നു മുല്ലപ്പള്ളി രാമചന്ദ്രനും, പി.കെ.കുഞ്ഞാലിക്കുട്ടിയും ആവശ്യപ്പെട്ടു. പോസ്റ്റുമോര്ട്ടത്തിനു ശേഷം തിരുവനന്തപുരം പ്രസ്ക്ലബില് പൊതുദര്ശനത്തിനുവെച്ച മൃതദേഹത്തില് മുന് മുഖ്യമന്ത്രി ഉമ്മന്ചാണ്ടിയുള്പ്പെടെയുള്ള പ്രമുഖര് ആദരാഞ്ജലിയര്പ്പിച്ചു.