തിരുവനന്തപുരം: കനത്ത ചൂടിലും വൈദ്യുതി പ്രതിസന്ധിയിലും വലയുന്ന സംസ്ഥാനത്തിന് ആശ്വാസമായി ഇന്ന് മുതല് പരക്കെ മഴയ്ക്ക് സാധ്യത. വടക്കന് ബംഗാള് ഉള്ക്കടലില് രൂപപ്പെടുന്ന ന്യൂനമര്ദത്തിന്റെ സ്വാധീന ഫലമായി സംസ്ഥാനത്ത് ഇന്ന് മുതല് സെപ്റ്റംബര് 12 വരെ ഒറ്റപ്പെട്ട ശക്തമായ മഴ ലഭിക്കുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
മഴ മുന്നറിയിപ്പിന്റെ പശ്ചാത്തലത്തില് ഇന്ന് ആലപ്പുഴ, എറണാകുളം ജില്ലകളില് കേന്ദ്ര കാലാവസ്ഥാ വകുപ്പ് യെല്ലോ അലര്ട്ട് പ്രഖ്യാപിച്ചിട്ടുണ്ട്. നാളെ പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലും സെപ്റ്റംബര് 12 ന് പത്തനംതിട്ട, ഇടുക്കി, പാലക്കാട് ജില്ലകളിലും യെല്ലോ അലര്ട്ട് നിലവിലുണ്ട്.
ബംഗാള് ഉള്ക്കടലില് ചക്രവാതച്ചുഴി
വടക്കന് ബംഗാള് ഉള്ക്കടലിനും അതിനോട് ചേര്ന്ന ബംഗ്ലാദേശ് തീരപ്രദേശത്തിനും മുകളിലായി രൂപപ്പെട്ട ചക്രവാതച്ചുഴിയാണ് മഴയ്ക്ക് കളമൊരുക്കുന്നത്. ഇത് അടുത്ത മണിക്കൂറുകളില് ശക്തമായ ന്യൂനമര്ദമായി മാറാന് സാധ്യതയുള്ളതാണ് കേരളത്തില് മഴ വീണ്ടും സജീവമാകാന് കാരണം. മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന ശക്തമായ മഴയ്ക്കാണ് സാധ്യത പ്രവചിച്ചിരിക്കുന്നത്.
പ്രതീക്ഷയോടെ കെഎസ്ഇബി
കനത്ത വേനലിന് സമാനമായ ചൂടാണ് കഴിഞ്ഞ ദിവസങ്ങളില് സംസ്ഥാനത്തുടനീളം അനുഭവപ്പെട്ടത്. ചൂട് കൂടിയതോടെ ഗാര്ഹിക ഉപയോഗം എക്കാലത്തെയും ഉയര്ന്ന നിലയിലെത്തുകയും വൈദ്യുതി ശൃംഖലയില് 800 മെഗാവാട്ടിലേറെ ലഭ്യതക്കുറവ് അനുഭവപ്പെടുകയും ചെയ്തു. ഇതേത്തുടര്ന്ന് പലയിടങ്ങളിലും രാത്രികാലങ്ങളില് മുന്നറിയിപ്പില്ലാതെ അപ്രഖ്യാപിത ലോഡ്ഷെഡിങിന് സമാനമായ തടസങ്ങള് നേരിട്ടിരുന്നു. മഴ പെയ്യുന്നതോടെ അന്തരീക്ഷ താപനില കുറയുകയും കൂളിങ് ഉപകരണങ്ങളുടെ ഉപയോഗം നിയന്ത്രണ വിധേയമാകുകയും ചെയ്യുമെന്ന കണക്കുകൂട്ടലിലാണ് കെഎസ്ഇബി. ഇത് നിലവിലെ രൂക്ഷമായ പവര്കട്ട് ഭീഷണിക്ക് വലിയ ആശ്വാസമാകുമെന്നാണ് കരുതുന്നത്.