മുംബൈ: ജയിലില് കഴിയുന്ന ഗുണ്ടാ നേതാവ് ലോറന്സ് ബിഷ്ണോയിയുടെ സഹോദരനായ അന്മോല് ബിഷ്ണോയിയെ യുഎസില് നിന്ന് ഇന്ത്യയിലെത്തിക്കും. എന്സിപി നേതാവ് ബാബാ സിദ്ദിഖിയെ (66) നഗരമധ്യത്തില് വെടിവച്ചുകൊന്ന കേസിന്റെ ആസൂത്രകനാണ് അന്മോല്.
ഇയാളെ നാടുകടത്തിയ വിവരം യുഎസ് അധികൃതര് ബാബ സിദ്ദിഖിയുടെ കുടുംബത്തെ അറിയിച്ചു. ഇ-മെയിലിന്റെ സ്ക്രീന്ഷോട്ട് കുടുംബം പുറത്തുവിട്ടു. പഞ്ചാബ് സ്വദേശിയായ അന്മോല് നേപ്പാള് വഴി ദുബായിലെത്തി കെനിയയിലേക്ക് കടന്നു. അവിടെ നിന്നാണ് യുഎസിലെത്തിയത്. നവംബറില് അറസ്റ്റിലായി. അന്മോലിനെ കണ്ടെത്തുന്നവര്ക്ക് എന്ഐഎ 10 ലക്ഷം രൂപ പ്രതിഫലം പ്രഖ്യാപിച്ചിരുന്നു.
നടന് സല്മാന് ഖാനുമായി അടുത്ത സൗഹൃദമുള്ള സിദ്ദിഖി 2024 ഒക്ടോബര് 12 നാണ് വെടിയേറ്റ് മരിച്ചത്. പ്രത്യേക പൊലീസ് സുരക്ഷയുള്ള മുന് മന്ത്രി കൂടിയായ സിദ്ദിഖി ബാന്ദ്രയിലെ മകന്റെ ഓഫീസിന് മുന്നില് നിന്നും കാറില് കയറുന്നതിനിടെയാണ് അദേഹത്തെ മൂന്നു പേരുടെ സംഘം വെടിവച്ചത്.