ചെന്നൈ: ഡിറ്റ് വാ ചുഴലിക്കാറ്റ് കൂടുതല്‍ വേഗത കൈവരിച്ച് തമിഴ്‌നാട് തീരത്തോട് അടുക്കുന്നതിനാല്‍ തീരദേശവാസികള്‍ക്ക് അതീവ ജാഗ്രതാ മുന്നറിയിപ്പ് നല്‍കി. നിരവധി വിമാന, ട്രെയിന്‍ സര്‍വീസുകള്‍ റദ്ദാക്കുകയും സ്‌കൂളുകള്‍ അടയ്ക്കുകയും ചെയ്തു.
അടുത്ത 48 മണിക്കൂറില്‍ ശക്തമായ മഴയ്ക്കും കാറ്റിനും സാധ്യതയുണ്ടെന്നാണ് കാലാവസ്ഥാ വകുപ്പിന്റെ പ്രവചനം. ചുഴലിക്കാറ്റ് മുന്നറിയിപ്പിന്റെ പശ്ചാത്തലത്തില്‍ ചെന്നൈ വിമാനത്താവളത്തില്‍നിന്നുള്ള 54 വിമാനങ്ങള്‍ റദ്ദാക്കി.
മധുര, തിരുച്ചിറപ്പള്ളി, തൂത്തുക്കുടി, സേലം, ബെംഗളൂരു, ഹൈദരാബാദ്, ജാഫ്‌ന എന്നിവിടങ്ങളിലേക്കുള്ള വിമാന സര്‍വീസുകളെയാണ് ചുഴലിക്കാറ്റ് ഏറെയും ബാധിച്ചിരിക്കുന്നത്.
നാഗപട്ടണത്ത് ശക്തമായ മഴ തുടരുകയാണ്. നിരവധി പ്രദേശങ്ങള്‍ വെള്ളക്കെട്ടിലാണ്. കടലൂര്‍ ജില്ലയില്‍ ഒരു ലക്ഷത്തോളം പേരെ മാറ്റിപ്പാര്‍പ്പിക്കാനാവശ്യമായ തയ്യാറെടുപ്പുകള്‍ നടത്തിക്കഴിഞ്ഞതായി മന്ത്രി എംആര്‍കെ പന്നീര്‍ സെല്‍വം പറഞ്ഞു.
ഡിറ്റ് വ ചുഴലിക്കാറ്റ് ശ്രീലങ്കയില്‍ വന്‍ ദുരിതം വിതച്ചിരുന്നു. കനത്ത മഴയിലും വെള്ളപ്പൊക്കത്തിലും 123 പേരാണ് മരിച്ചത്. 130 പേരെ കാണാതായെന്നും റിപ്പോര്‍ട്ടുണ്ട്. അരലക്ഷത്തോളം പേരെയാണ് ദുരിതാശ്വാസ കേന്ദ്രത്തിലേക്ക് മാറ്റിയതെന്ന് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നു.