ഇസ്താംബൂള്‍: റഷ്യന്‍ എണ്ണക്കപ്പലായ 'വിരാടി'ന് നേരേ ഉക്രെയ്‌ന്റെ ആക്രമണം. തുര്‍ക്കിയിലെ കരിങ്കടല്‍ തീരത്ത് ആളില്ലാ യാനം ഉപയോഗിച്ച് നടത്തിയ ആക്രമണത്തെ തുടര്‍ന്ന് കപ്പലിന് തീ പിടിച്ചു.
പഴയ എണ്ണക്കപ്പലുകള്‍ ഉള്‍പ്പെട്ട 'ഷാഡോ ഫ്ളീറ്റ്' കപ്പല്‍ വ്യൂഹത്തില്‍ പെട്ടതാണ് വിരാട്. ഇത്തരം കപ്പലുകള്‍ തങ്ങളുടെ യഥാര്‍ഥ വിവരങ്ങള്‍, ഉടമസ്ഥത, യാത്രാ വഴികള്‍ എന്നിവ മറച്ചു വെച്ച് ഉപരോധമുള്ള ചരക്കുകള്‍ കടത്തുകയും അന്താരാഷ്ട്ര നിയമങ്ങളെയും പരിശോധനകളെയും മറികടക്കുകയും ചെയ്യാറുണ്ട്.
കരിങ്കടല്‍ തീരത്തുനിന്ന് 35 മൈല്‍ അകലെ വെച്ചാണ് വിരാടിന് നേര്‍ക്ക് ആക്രമണമുണ്ടായത്. ആദ്യ ആക്രമണം വെള്ളിയാഴ്ച രാത്രിയായിരുന്നു. പിന്നാലെ ശനിയാഴ്ച പുലര്‍ച്ചെയും ആക്രമണമുണ്ടായി. ആക്രമണത്തില്‍ കപ്പലിന് കാര്യമായ കേടുപാടുകളുണ്ടായെങ്കിലും ജീവനക്കാര്‍ സുരക്ഷിതരാണ് എന്നാണ് വിവരം.
ആക്രമണത്തിന്റെ ഉത്തരവാദിത്വം ഏറ്റെടുത്ത ഉക്രെയ്ന്‍ കൃത്യം നിര്‍വഹിക്കാന്‍ സീ ബേബി ഡ്രോണുകളാണ് ഉപയോഗിച്ചതെന്ന് അവകാശപ്പെട്ടു.
അതേസമയം, വെള്ളിയാഴ്ച റഷ്യയിലേക്ക് പുറപ്പെട്ട മറ്റൊരു എണ്ണക്കപ്പലിലും കരിങ്കടലില്‍ വെച്ച് പൊട്ടിത്തെറിയുണ്ടായി. റഷ്യയിലെ നൊവോറോസിസ്‌ക് തുറമുഖത്തേക്ക് പുറപ്പെട്ട കെയ്റോസ് എന്ന കപ്പലിലാണ് പൊട്ടിത്തെറിയുണ്ടായത്. കപ്പലിലെ 25 ജീവനക്കാരെയും രക്ഷപ്പെടുത്തിയിരുന്നു.