അൾജിയേഴ്സ്: ആഗോള സമാധാനത്തിന്റെയും മതസൗഹാർദ്ദത്തിന്റെയും പുതിയ സന്ദേശവുമായി ലിയോ പതിനാലാമൻ മാർപാപ്പ ആഫ്രിക്കൻ പര്യടനത്തിന് തുടക്കം കുറിച്ചു. പത്ത് ദിവസം നീണ്ടുനിൽക്കുന്ന ചരിത്ര യാത്രയുടെ ആദ്യപാദമായി പരിശുദ്ധ പിതാവ് അൾജീരിയയിലെ ഹുവാരി ബൗമീഡിയൻ അന്താരാഷ്ട്ര വിമാനത്താവളത്തിൽ വിമാനമിറങ്ങി. സഭയുടെ അജപാലന ദൗത്യത്തിനപ്പുറം വൻകരയിലെ വിവിധ മതവിഭാഗങ്ങൾക്കിടയിൽ ഐക്യത്തിന്റെ വിത്തുപാകുക എന്ന വലിയ ലക്ഷ്യവുമായാണ് പാപ്പയുടെ ഈ സന്ദർശനം.
വിമാനത്താവളത്തിൽ എത്തിയ പാപ്പയെ അൾജീരിയൻ സർക്കാർ പ്രതിനിധികളും ഉന്നത മതനേതാക്കളും ചേർന്ന് ഔദ്യോഗിക ബഹുമതികളോടെ വരവേറ്റു. സൈനിക ഗാർഡ് ഓഫ് ഓണറിന് ശേഷം നടന്ന സ്വീകരണ ചടങ്ങ് രാജ്യത്തെ മുസ്ലിം-ക്രൈസ്തവ സാഹോദര്യത്തിന്റെ ഉദാത്തമായ പ്രതീകമായി മാറി.
അടുത്ത രണ്ട് ദിവസങ്ങളിൽ അൾജീരിയയിൽ വിവിധ നയതന്ത്ര, സഭാ സമ്മേളനങ്ങളിൽ മാർപാപ്പ പങ്കെടുക്കും. മേഖലയിലെ സമാധാനം, മാനവികതയുടെ പൊതുവായ ബന്ധങ്ങൾ എന്നിവയെക്കുറിച്ച് പരിശുദ്ധ പിതാവ് സംസാരിക്കുമെന്നാണ് പ്രതീക്ഷിക്കുന്നത്.
ആധുനിക ലോകത്ത് വർധിച്ച് വരുന്ന സംഘർഷങ്ങൾക്കിടയിൽ പാപ്പയുടെ ആഫ്രിക്കൻ സന്ദർശനം ആഗോള സമാധാന ചർച്ചകളിൽ പുതിയ ചലനങ്ങൾ സൃഷ്ടിക്കുമെന്ന് രാഷ്ട്രീയ നിരീക്ഷകർ വിലയിരുത്തുന്നു. ലോകം മുഴുവൻ ഉറ്റുനോക്കുന്ന ഈ പര്യടനം വൻകരയുടെ സാമൂഹിക-സാംസ്കാരിക മേഖലകളിൽ വലിയ മാറ്റങ്ങൾക്ക് വഴിയൊരുക്കും.