ലണ്ടൻ: ഗ്രേറ്റ് ബ്രിട്ടൻ സീറോ മലബാർ രൂപതയിൽ നിന്നും ആദ്യമായി ഒരു സന്ന്യാസിനി രൂപം കൊള്ളുന്നു. സിസ്റ്റർ ക്രിസ്റ്റി മരിയ എസ്.എച്ചാണ് ഈ ചരിത്രപരമായ തീരുമാനത്തിലൂടെ രൂപതയുടെ ആദ്യ സന്ന്യാസിനിയായി വ്രതവാഗ്ദാനം നടത്തി സമർപ്പിത ജീവിതത്തിലേക്ക് പ്രവേശിച്ചത്.
ലണ്ടനിലെ ടൂട്ടിങ് സെന്റ് ബോണിഫസ് ചർച്ചിൽ വെച്ച് നടന്ന പ്രത്യേക പ്രാർത്ഥനാ ശുശ്രൂഷയിൽ വെച്ചായിരുന്നു വ്രതവാഗ്ദാനവും സന്യാസ വസ്ത്ര സ്വീകരണവും നടന്നത്. ഗ്രേറ്റ് ബ്രിട്ടൻ സീറോ മലബാർ രൂപതാധ്യക്ഷൻ മാർ ജോസഫ് സ്രാമ്പിക്കലിന്റെ മുഖ്യകാർമ്മികത്വത്തിലാണ് ഈ ചരിത്രപരമായ കർമ്മങ്ങൾ പൂർത്തിയായത്.
മുൻപ് ഫാർമസിസ്റ്റായി ജോലി ചെയ്തിരുന്ന സിസ്റ്റർ ക്രിസ്റ്റി മരിയ തന്റെ ഔദ്യോഗിക ജീവിതം ഉപേക്ഷിച്ചാണ് സന്യാസ ജീവിതത്തിലേക്ക് തിരിഞ്ഞത്. നാല് വർഷത്തെ തീവ്രമായ സന്യാസ പരിശീലനത്തിന് ശേഷമാണ് ദാരിദ്ര്യം, ബ്രഹ്മചര്യം, അനുസരണം എന്നീ സുവിശേഷ വ്രതങ്ങൾ സ്വീകരിച്ച് അവർ ഈ പവിത്രമായ പാതയിലേക്ക് പ്രവേശിച്ചത്. സഭയുടെയും ക്രിസ്തുവിന്റെയും ശുശ്രൂഷയ്ക്കായി തന്നെ പൂർണമായി സമർപ്പിച്ചുകൊണ്ട് രൂപതയുടെ ചരിത്രത്തിൽ ഇടംപിടിച്ചിരിക്കുകയാണ് സിസ്റ്റർ ക്രിസ്റ്റി മരിയ എസ്.എച്ച്.