വത്തിക്കാൻ സിറ്റി: പത്രോസിന്റെ പിൻഗാമിയായി കഴിഞ്ഞ വർഷം തിരഞ്ഞെടുക്കപ്പെട്ടതു മുതൽ ലോക സമാധാനവുമായി ബന്ധപ്പെട്ട് ലിയോ പതിനാലാമൻ മാർപാപ്പ നടത്തിയിട്ടുള്ള വിവിധ പ്രഭാഷണങ്ങളും സന്ദേശങ്ങളും അടിസ്ഥാനമാക്കി പുതിയ പുസ്തകം പുറത്തിറക്കി. "ആയുധ രഹിതവും നിരായുധീകരിക്കുന്നതും: സമാധാനം ഒരു ദാനമാണ്" എന്ന പേരിലാണ് വത്തിക്കാൻ ഈ പുസ്തകം പ്രസിദ്ധീകരിച്ചിരിക്കുന്നത്.
പ്രശസ്ത മാധ്യമ പ്രവർത്തകനായ അലെസാന്ദ്രോ ബാൻഫി എഡിറ്റ് ചെയ്തിട്ടുള്ള ഈ പുസ്തകത്തിൽ സമാധാനത്തെക്കുറിച്ചുള്ള പരിശുദ്ധ പിതാവിന്റെ പ്രത്യേക ആമുഖ സന്ദേശവും ഉൾപ്പെടുത്തിയിട്ടുണ്ടെന്ന് വത്തിക്കാൻ പ്രസിദ്ധീകരണശാല ഔദ്യോഗികമായി അറിയിച്ചു.
സാങ്കേതിക, ആയുധ രംഗങ്ങളിൽ വലിയ നേട്ടങ്ങൾ കൈവരിച്ചുവെന്ന് അഭിമാനിക്കുന്ന ഇക്കാലത്തും ആയുധങ്ങളല്ല മറിച്ച് നിരായുധീകരണമാണ് യഥാർത്ഥ സമാധാനം സൃഷ്ടിക്കുന്നത് എന്ന ശക്തമായ ഉദ്ബോധനമാണ് ഈ പുസ്തകം മുന്നോട്ടുവെക്കുന്നത്. ഉത്ഥിതനായ ക്രിസ്തു ശിഷ്യർക്ക് നൽകുന്ന സമാധാനാശംസയെക്കുറിച്ച് പരാമർശിച്ചുകൊണ്ടാണ് പുസ്തകത്തിന്റെ ആമുഖം ആരംഭിക്കുന്നത്.
ഈ സമാധാനം ഉത്ഥിതൻ ലോകം മുഴുവനുമായി നൽകുന്ന അമൂല്യമായ സമ്മാനമാണ്. ആയുധരഹിതനും നിരായുധീകരിക്കുന്നവനുമായ യേശു ചരിത്രത്തിൽ അനീതി ഏറ്റുവാങ്ങിയെങ്കിലും അവൻ ഉയിർത്തെഴുന്നേറ്റുവെന്ന് ലിയോ പാപ്പ തന്റെ ആമുഖ സന്ദേശത്തിൽ ഓർമ്മിപ്പിക്കുന്നുണ്ട്.
ഇന്ന് ലോകമെമ്പാടും നൂറ്റിമൂന്ന് രാജ്യങ്ങളിൽ ഏതെങ്കിലും വിധത്തിലുള്ള യുദ്ധങ്ങളോ സായുധ സംഘർഷങ്ങളോ നിലനിൽക്കുന്നുണ്ടെന്ന് പാപ്പ ആശങ്കയോടെ കുറിച്ചു. ഉക്രെയ്ൻ, മധ്യപൂർവ്വദേശങ്ങൾ, സുഡാൻ, മ്യാന്മാർ, യെമൻ, കോംഗോ തുടങ്ങിയ സംഘർഷഭൂമികളെ പാപ്പ സന്ദേശത്തിൽ പ്രത്യേകമായി പരാമർശിച്ചിട്ടുണ്ട്.
സമാധാനം എന്നത് കേവലം രാഷ്ട്രീയമായ ചർച്ചകളിൽ ഒതുങ്ങുന്ന ഒന്നല്ല, മറിച്ച് അത് ഓരോ വ്യക്തിയുടെയും ഉത്തരവാദിത്വമാണെന്ന് പാപ്പ ഓർമ്മിപ്പിക്കുന്നു. മറ്റുള്ളവർക്കെതിരെ കുറ്റപ്പെടുത്തലോ വിധിപ്രസ്താവനകളോ നടത്തുന്നതിലൂടെയല്ല, സ്വന്തം ജീവിതത്തിൽ നിന്നാണ് സമാധാനം ആരംഭിക്കേണ്ടത്.
ആരും യുദ്ധം നടത്തുന്നത് യുദ്ധത്തിന് വേണ്ടി മാത്രമായിട്ടല്ലെന്നും ആത്യന്തികമായി എല്ലാവരും നീതിക്കും സമാധാനത്തിനുമാണ് അഭിലഷിക്കുന്നതെന്നും അത് യുദ്ധങ്ങൾക്ക് കാരണമാകുന്നവർക്ക് ഉൾപ്പെടെ ഏവർക്കും അറിയാമെന്നും ലിയോ പാപ്പ തന്റെ സന്ദേശത്തിൽ വ്യക്തമാക്കുന്നു. ആഗോള ക്രൈസ്തവ സമൂഹത്തിനും സമാധാന കാംക്ഷികൾക്കും വലിയൊരു മാർഗ്ഗനിർദ്ദേശമായി മാറിയിരിക്കുകയാണ് ഈ പുതിയ ഗ്രന്ഥം.