മോസ്‌കോ:ചെര്‍ണോബില്‍ ആണവ നിലയം തങ്ങള്‍ പിടിച്ചെടുത്തെങ്കിലും പൂര്‍ണ്ണ സുരക്ഷ ഉറപ്പുവരുത്തിയിട്ടുള്ളതായി റഷ്യ. നിലയത്തിലെ ആണവ അവശിഷ്ടങ്ങള്‍ സംരക്ഷിക്കുന്ന ജോലി നിലവിലുള്ള ജീവനക്കാരെ തന്നെ ഉപയോഗിച്ച് ക്രമ പ്രകാരം നടത്തുന്നതായി റഷ്യന്‍ ഉന്നത ഉദ്യോഗസ്ഥര്‍ അറിയിച്ചു.സംരക്ഷണ പ്രവര്‍ത്തനങ്ങള്‍ ഉക്രെയ്ന്‍ സേനയുമായി ചര്‍ച്ച നടത്തിയാണ് ഏറ്റെടുത്തതെന്ന് റഷ്യയുടെ പ്രതിരോധ മന്ത്രാലയം വക്താവ് മേജര്‍ ജനറല്‍ ഐഗര്‍ കോനഷെങ്കോവ് പറഞ്ഞു.
ആണവനിലയത്തിന് കാവല്‍ നിന്ന ഉക്രെയ്ന്‍ സൈന്യത്തെ കനത്ത പോരാട്ടത്തിലൂടെ പരാജയപ്പെടുത്തിയാണ് റഷ്യ നിയന്ത്രണം ഏറ്റെടുത്തത്.അതേസമയം, റഷ്യയുടെ കൈയില്‍ സംരക്ഷണ പ്രവര്‍ത്തനം സുരക്ഷിതമല്ലെന്നാണ് ഉക്രെയ്ന്‍ വ്യക്തമാക്കിയത്. ഇതോടെ നിലയത്തിന്റെ സുരക്ഷയെപ്പറ്റി ലോകമെങ്ങും ആശങ്കയുയര്‍ന്നിരുന്നു.സൈനിക വാഹനങ്ങള്‍ കാരണം ആണവ വികിരണമുള്ള പൊടിപടലം ഉയര്‍ന്നെന്നും സാധാരണയിലും ഉയര്‍ന്ന ഗാമാ വികിരണങ്ങള്‍ രേഖപ്പെടുത്തിയെന്നും ഉക്രെയ്‌നിലെ ന്യൂക്ലിയര്‍ എനര്‍ജി റഗുലേറ്ററി ഏജന്‍സി വ്യക്തമാക്കി. എന്നാല്‍ ഇക്കാര്യം ഐഗര്‍ കോനഷെങ്കോവ് നിഷേധിച്ചു.ആണവവികിരണം തടയുന്ന പ്രവര്‍ത്തനത്തില്‍ ഏര്‍പ്പെട്ടിട്ടുള്ള അതേ ജീവനക്കാര്‍ തന്നെ തുടര്‍ന്നും ചുമതല നിര്‍വഹിക്കും.
ഇതിനിടെ, റഷ്യയുടെ അധിനിവേശത്തിനിടയിലും ചെര്‍ണോബില്‍ ആണവ നിലയവും ഉക്രെയ്‌നിലെ 15 പ്രവര്‍ത്തിക്കുന്ന റിയാക്ടറുകളും സുരക്ഷിതവും സുരക്ഷിതവുമാണെന്ന് ആണവ വിദഗ്ധരും ലോക ആണവ സുരക്ഷാ മാനദണ്ഡങ്ങള്‍ നിശ്ചയിക്കുന്ന ഐക്യരാഷ്ട്രസഭയുടെ വിഭാഗമായ ഇന്റര്‍നാഷണല്‍ ആറ്റോമിക് എനര്‍ജി ഏജന്‍സിയും അഭിപ്രായപ്പെട്ടു.
കേംബ്രിഡ്ജിലെ സ്വകാര്യ ഗ്രൂപ്പായ യൂണിയന്‍ ഓഫ് കണ്‍സേണ്‍ഡ് സയന്റിസ്റ്റിലെ റിയാക്ടര്‍ വിദഗ്ധനായ എഡ്വിന്‍ ലൈമാന്‍ പറഞ്ഞു: 'സമീപത്തുള്ള ഏതെങ്കിലും ലക്ഷ്യത്തിനു നേരെയുണ്ടാകുന്ന ആക്രമണങ്ങളില്‍ നിന്നുള്ള പ്രത്യാഘാതമേല്‍ക്കാന്‍ ഇടയുള്ളത് മാത്രമാണ് യഥാര്‍ത്ഥ പ്രശ്‌നം. അതല്ലാതെ റേഡിയേഷന്‍ ഭീഷണി അധികമായി ഉണ്ടാകില്ല. റഷ്യ മനഃപൂര്‍വം ഒരു പ്ലാന്റിനെ ലക്ഷ്യമിടുമെന്ന് ഞാന്‍ കരുതുന്നില്ല.'
1986-ല്‍ ചെര്‍ണോബില്‍ ആണവ നിലയത്തിന് തകര്‍ച്ച സംഭവിച്ചപ്പോള്‍ യൂറോപ്പിന്റെ ചില ഭാഗങ്ങളിലേക്ക് റേഡിയോ ആക്ടീവ് മേഘങ്ങള്‍ വ്യാപിച്ചിരുന്നു. നാല് ചെര്‍ണോബില്‍ റിയാക്ടറുകളും ഇപ്പോഴും അടച്ചിട്ടിരിക്കുകയാണ്. നൂറുകണക്കിന് ചതുരശ്ര മൈല്‍ വിസ്തൃതിയുള്ള ഒരു മേഖല ഒഴിവാക്കപ്പെട്ടു. ഇവിടെപൊതുജനങ്ങളുടെ പ്രവേശനവും പാര്‍പ്പിടവും പരിമിതപ്പെടുത്തി.
റഷ്യയുടെ ലക്ഷ്യം ദേശീയ നാശമല്ല, ഭരണമാറ്റമാണ്. ഉക്രെയ്‌നിലെ റിയാക്ടറുകളും വൈദ്യുത സംവിധാനങ്ങളും സുഗമമായി പ്രവര്‍ത്തിക്കുകയെന്നത് മോസ്‌കോയുടെ താല്‍പ്പര്യമാണെന്ന് നിരീക്ഷകര്‍ പറയുന്നു. റഷ്യന്‍ സഖ്യകക്ഷിയായ ബെലാറസില്‍ നിന്ന് ഏകദേശം 10 മൈല്‍ അകലെയുള്ള വിശാലമായ പ്ലാന്റ് പ്രദേശം റഷ്യയുടെ പ്രധാന അധിനിവേശ റൂട്ടുകളിലൊന്നാണ്.
അതേസമയം, നേരിട്ടുള്ള 'ഹിറ്റ്' അപകടസാധ്യതയുള്ളതു തന്നെയാണെന്നത് ഭീതി ഉയര്‍ത്തുന്നതായി മസാച്ചുസെറ്റ്‌സ് ഇന്‍സ്റ്റിറ്റ്യൂട്ട് ഓഫ് ടെക്‌നോളജിയിലെ ന്യൂക്ലിയര്‍ സയന്‍സ് പ്രൊഫസറായ ആര്‍. സ്‌കോട്ട് കെമ്പ് പറഞ്ഞു. 'എന്നാല്‍ അവര്‍ അത് ഒഴിവാക്കാന്‍ സാധ്യമായതെല്ലാം ചെയ്യുമെന്ന് ഞാന്‍ കരുതുന്നു, കാരണം അവരും വീഴ്ചയെ നേരിടാന്‍ ആഗ്രഹിക്കുന്നില്ല.'ആണവോര്‍ജ്ജ നിലയങ്ങള്‍ പ്രവര്‍ത്തന രഹിതമാകുന്നതിലൂടെ സംഭവിക്കാവുന്ന ഉക്രെയ്ന്‍ പവര്‍ ഗ്രിഡിന്റെ തകര്‍ച്ചയാണ് ഏറ്റവും വലിയ ഭീഷണിയെന്ന് ഡോ. കെംപ് പറഞ്ഞു.
പൊട്ടിത്തെറിയെ തുടര്‍ന്ന് 1986 ഏപ്രില്‍ 26ന് ചെര്‍ണോബിലില്‍ ഉണ്ടായത് ചരിത്രത്തിലെ ഏറ്റവും വലിയ ആണവദുരന്തമായിരുന്നു. 36 പേര്‍ ഉടന്‍ മരിച്ചു.അധിക ആണവ വികിരണം മൂലം ആയിരക്കണക്കിന് ആളുകള്‍ പിന്നീടു മരണത്തിനു കീഴടങ്ങി. 20 മൈല്‍ ചുറ്റളവില്‍ താമസിച്ചിരുന്ന 1,35,000 പേരെ ഒഴിപ്പിച്ചു. ദുരന്തത്തോടെ നിലയം അടച്ചുപൂട്ടി. സ്‌ഫോടനത്തില്‍ തകര്‍ന്ന റിയാക്ടറില്‍ നിന്ന് ആണവ വികിരണമുണ്ടാകാതെ തടയാന്‍ സുരക്ഷിത കവചം നിര്‍മിച്ചു. പ്രത്യേകം നിര്‍മിച്ച കൂളന്റ് ടാങ്കുകളിലേക്ക് ഇന്ധന റോഡുകള്‍ മാറ്റുകയും ചെയ്തു. 100 ടണ്ണോളം ആണവ അവശിഷ്ടങ്ങളുടെ സംരക്ഷണമാണ്് ഇവിടത്തെ നിര്‍ണ്ണായക ദൗത്യം. ഇക്കാര്യത്തിലെ ചെറിയ വീഴ്ച പോലും ലോകത്തിന് അപായകരമാകാം.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.