ബംഗളൂരു: സ്‌കൂള്‍ കെട്ടിടത്തിന്റെ മുകളില്‍ നിന്ന് നാലുവയസുകാരി വീണ് മരിച്ച സംഭവത്തില്‍ പ്രിന്‍സിപ്പലിനെ ഒന്നാം പ്രതിയാക്കി പൊലീസ് കേസെടുത്തു. കോട്ടയം മണിമല സ്വദേശി ജിന്റോ ടോമി ജോസഫിന്റെ മകള്‍ ജിയന്ന ആന്‍ ജിജോയാണ് കഴിഞ്ഞ ദിവസം ബംഗളൂരുവിലെ സ്വകാര്യ സ്‌കൂള്‍ കെട്ടിടത്തിനു മുകളില്‍ നിന്ന് താഴേക്ക് വീണ് മരണപ്പെട്ടത്.
അപകടത്തില്‍ ഗുരുതരമായി പരിക്കേറ്റ കുട്ടിയെ ആശുപത്രിയില്‍ എത്തിച്ചെങ്കിലും ചികിത്സയില്‍ കഴിയവെയായിരുന്നു മരണം. സ്‌കൂള്‍ അധികൃതരുടെ അലംഭാവമാണ് അപകടത്തിന് ഇടയാക്കിയതെന്ന് ആരോപിച്ച് കുടുംബം പൊലീസില്‍ പരാതി നല്‍കി.
മാതാപിതാക്കളുടെ പരാതിയെ തുടര്‍ന്നാണ് സ്‌കൂള്‍ പ്രിന്‍സിപ്പലും കോട്ടയം സ്വദേശിയുമായ തോമസ് ചെറിയാനെയും കണ്ടാല്‍ അറിയുന്ന മറ്റൊരു ജീവനക്കാരനെയും പ്രതിയാക്കി പൊലീസ് കേസെടുത്തു. ഇവരെ കൂടാതെ സംഭവത്തില്‍ രണ്ട് ആയമാരെയും പൊലീസ് ചോദ്യം ചെയ്തു.