ന്യൂഡല്‍ഹി: റദ്ദാക്കിയ പന്ത്രണ്ടാം ക്ലാസ് പരീക്ഷയുടെ മൂല്യനിര്‍ണയ മാനദണ്ഡങ്ങളില്‍ അതൃപ്തിയുള്ളവര്‍ക്ക് ഓഗസ്റ്റ് 15നും സെപ്തംബര്‍ 15നുമിടയില്‍ എഴുത്തുപരീക്ഷ നടത്താമെന്ന് സി.ബി.എസ്.ഇ സുപ്രീംകോടതിയില്‍ അറിയിച്ചു.
പരീക്ഷ റദ്ദാക്കിയത് പുനപ്പരിശോധിക്കണം, മൂല്യനിര്‍ണയ രീതി പുനക്രമീകരിക്കണം തുടങ്ങിയ ആവശ്യങ്ങള്‍ ഉന്നയിച്ചുള്ള ഒരുകൂട്ടം ഹര്‍ജികളാണ് ജസ്റ്റിസുമാരായ എ.എം ഖാന്‍വില്‍ക്കര്‍, ദിനേശ് മഹേശ്വരി എന്നിവരുള്‍പ്പെട്ട ബെഞ്ച് പരിഗണിച്ചത്.
പുതിയ മൂല്യനിര്‍ണയ രീതിയിലുള്ള പരാതികള്‍ പരിഹരിക്കാന്‍ പ്രത്യേക സമിതിക്ക് രൂപം നല്‍കിയിട്ടുണ്ട്. എഴുത്തുപരീക്ഷ ഓണ്‍ലൈനായി രജിസ്റ്റര്‍ ചെയ്യാം. പ്രധാന വിഷയങ്ങളില്‍ മാത്രമേ പരീക്ഷയുണ്ടാകൂ. ഫലം അന്തിമമായിരിക്കും.
എന്നാൽ വിദ്യാ‌ര്‍ത്ഥികളില്‍ പ്രതീക്ഷയാണ്, ആശങ്കയല്ല വേണ്ടതെന്ന് ബെഞ്ച് നിരീക്ഷിച്ചു. പരീക്ഷ റദ്ദാക്കിയത് പുനപ്പരിശോധിക്കേണ്ട ആവശ്യമില്ലെന്നും വ്യക്തമാക്കി. കേസ് ഇന്ന് വീണ്ടും പരിഗണിക്കും.
അതേസമയം കേരളത്തിൽ സെപ്തംബര്‍ ആറിന് ആരംഭിക്കാനിരിക്കുന്ന പ്ലസ് വണ്‍ പരീക്ഷ റദ്ദാക്കണമെന്ന രക്ഷിതാക്കളുടെ ആവശ്യത്തില്‍ ഇന്ന് അന്തിമ തീരുമാനം അറിയിക്കണമെന്ന് സുപ്രീംകോടതി കേരളത്തിന് നി‌ര്‍ദേശം നല്‍കി. ഇന്നുതന്നെ അന്തിമ വിധിയുണ്ടാകുമെന്നും ജസ്റ്റിസുമാരായ എ.എം.ഖാന്‍ വില്‍ക്കര്‍, ദിനേശ് മഹേശ്വരി എന്നിവരുള്‍പ്പെട്ട ബെഞ്ച് വ്യക്തമാക്കി. തീരുമാനം അറിയിക്കാന്‍ ഒരാഴ്ച സമയം കേരളം ആവശ്യപ്പെട്ടെങ്കിലും അടിയന്തരമായി മറുപടി സമര്‍പ്പിക്കണമെന്ന് ബെഞ്ച് നിര്‍ദേശിക്കുകയായിരുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.