തിരുവനന്തപുരം: കോവിഡ് ബാധിച്ച് മരണപ്പെട്ടവരുടെ കുടുംബങ്ങള്ക്ക് നിലവിലുള്ള ധനസഹായങ്ങള്ക്കു പുറമേ സമാശ്വാസ ധനസഹായം അനുവദിക്കാന് മന്ത്രി സഭാ യോഗം തീരുമാനിച്ചു. മരണപ്പെട്ട വ്യക്തിയെ ആശ്രയിച്ചു കഴിയുന്ന ബി.പി.എല് കുടുംബങ്ങള്ക്കാണ് ധനസഹായം ലഭിക്കുക.
വ്യക്തി സംസ്ഥാനത്തിന് അകത്തോ പുറത്തോ രാജ്യത്തിന് പുറത്തോ മരണപ്പെടുകയാണെങ്കിലും കുടുംബം സംസ്ഥാനത്ത് സ്ഥിര താമസം ആക്കിയിട്ടുണ്ടെങ്കില് ആനുകൂല്യം നല്കുമെന്നും സര്ക്കാര് വ്യക്തമാക്കി. ബി.പി.എല് വിഭാഗത്തില് ഉള്പ്പെടുത്താന് നിശ്ചയിക്കുമ്പോള്
മരണപ്പെട്ട വ്യക്തിയുടെ വരുമാനം ഒഴിവാക്കും. കൂടാതെ സാമൂഹ്യക്ഷേമ പെന്ഷന്, ക്ഷേമനിധി, മറ്റു പെന്ഷനുകള് ആശ്രിതര്ക്ക് ലഭ്യമാകുന്നത് അയോഗ്യതയായി കണക്കാക്കില്ല.
ഒറ്റ പേജില് ലളിതമായ ഫോറത്തില് അപേക്ഷ സമര്പ്പിക്കാന് ആശ്രിതര്ക്കു കഴിയണം. ഇതിനാവശ്യമായ തുടര് നടപടികള്ക്ക് ബന്ധപ്പെട്ട ജില്ലാ കലക്ടറെയും റവന്യൂ അധികാരികളെയും ചുമതലപ്പെടുത്തും. അപേക്ഷിച്ച് പരമാവധി 30 പ്രവൃത്തി ദിവസത്തിനകം ആനുകൂല്യം നല്കേണ്ടതാണെന്നും യോഗത്തില് വ്യക്തമാക്കി.
ആശ്രിത കുടുംബത്തില് സര്ക്കാര് ജീവനക്കാരോ ആദായനികുതി ദായകരോ ഇല്ലെന്ന് വില്ലേജ് ഓഫീസര് ഉറപ്പു വരുത്തണം. അപേക്ഷ തീര്പ്പാക്കുന്നതിന് അപേക്ഷകരെ ഓഫീസില് വിളിച്ചു വരുത്തുന്ന സ്ഥിതി ഉണ്ടാകരുതെന്നും യോഗം വിലയിരുത്തി.
പ്രതിമാസം 5000 രൂപ വീതം ഡയറക്ട് ബെനിഫിറ്റ് ട്രാന്സ്ഫര് ആയി തുക ലഭിക്കും. സമാശ്വാസം ലഭിക്കുന്ന മാസം മുതല് മൂന്നു വര്ഷത്തേയ്ക്കാണ് ഇത് നല്കുക. ഇതിനാവശ്യമായ തുക ബജറ്റില് വകയിരുത്തുന്നതു വരെ മുഖ്യമന്ത്രിയുടെ ദുരിതാശ്വാസ നിധിയില് നിന്ന് വഹിക്കാനാണ് തീരുമാനം.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26