കേരള ബജറ്റും ദീർഘകാല വികസന ചിന്തയും

മനുഷ്യരുടെ പൊതുസ്വഭാവത്തിൽ ശ്രദ്ധേയമായ ഒരു പ്രത്യേകതയുണ്ട്. ഹ്രസ്വകാല നേട്ടങ്ങൾക്കും തൽക്ഷണ ലാഭങ്ങൾക്കും ഉടനടി ലഭിക്കുന്ന ആനന്ദങ്ങൾക്കും വേണ്ടിയാണ് പലപ്പോഴും കൂടുതൽ ആഗ്രഹിക്കുകയും പരിശ്രമിക്കുകയും ചെയ്യുന്നത്.

ഒരു ലക്ഷ്യത്തിൽ അമിതമായി ശ്രദ്ധ കേന്ദ്രീകരിക്കുമ്പോൾ മറുവശത്തുള്ള ദീർഘകാല സാധ്യതകളും വെല്ലുവിളികളും പലപ്പോഴും കാഴ്ചയിൽ നിന്ന് മറഞ്ഞുപോകുന്നു. ഇത് വ്യക്തി ജീവിതത്തിൽ മാത്രമല്ല, പൊതുനയങ്ങളിലും രാഷ്ട്രീയ തീരുമാനങ്ങളിലും കാണപ്പെടുന്ന ഒരു യാഥാർഥ്യമാണ്.

തിരഞ്ഞെടുപ്പുകൾക്ക് മുന്നോടിയായി രാഷ്ട്രീയ പാർട്ടികൾ ജനങ്ങൾക്ക് മുന്നിൽ അവതരിപ്പിക്കുന്ന വാഗ്ദാനങ്ങളിലും ഈ സ്വഭാവം പ്രതിഫലിക്കാറുണ്ട്. ജനക്ഷേമം ലക്ഷ്യമാക്കിയുള്ള നിരവധി പദ്ധതികൾ ജനങ്ങൾക്ക് തൽക്ഷണ ആശ്വാസവും നേട്ടവും നൽകുന്നവയാണ്.

എന്നാൽ അത്തരം തീരുമാനങ്ങൾ ദീർഘകാല സാമ്പത്തിക പ്രത്യാഘാതങ്ങൾ സൃഷ്ടിക്കാനുള്ള സാധ്യതയും ഒരുപോലെ പരിഗണിക്കപ്പെടേണ്ടതാണ്. ജനക്ഷേമ പദ്ധതികൾ തിരഞ്ഞെടുപ്പുകൾക്കായി മാറ്റിവെക്കാതെ നടപ്പാക്കുന്ന ധാർമിക നിലപാട് അഭിനന്ദനാർഹമാണ്. അതേസമയം അവ സൃഷ്ടിക്കുന്ന അധിക സാമ്പത്തിക ബാധ്യത ഭാവിയിൽ നികുതിയുടെയോ മറ്റ് സാമ്പത്തിക ക്രമീകരണങ്ങളുടെയോ രൂപത്തിൽ വീണ്ടും ജനങ്ങളിലേക്കുതന്നെ തിരിച്ചെത്താൻ സാധ്യതയുണ്ടെന്ന യാഥാർഥ്യവും മറക്കാനാവില്ല.

കേരളത്തിന്റെ സാമ്പത്തിക വളർച്ചയും വരുമാന വർധനവും ലക്ഷ്യമാക്കി ചില മേഖലകൾ കൂടുതൽ ഗൗരവത്തോടെ പരിഗണിക്കപ്പെടേണ്ടതുണ്ട്.

1. സർക്കാർ ആസ്തികളുടെ കാര്യക്ഷമമായ വിനിയോഗം

സർക്കാർ സ്ഥാപനങ്ങൾ, കെട്ടിടങ്ങൾ, ഭൂമികൾ, വാഹനങ്ങൾ തുടങ്ങിയ ആസ്തികളുടെ വിനിയോഗത്തിൽ പുതിയ സമീപനങ്ങൾ സ്വീകരിക്കാവുന്നതാണ്. സ്വകാര്യ മേഖലയിലെ നിരവധി സ്ഥാപനങ്ങൾ, ബാങ്കുകൾ ഉൾപ്പെടെ, സ്വന്തമായി കെട്ടിടങ്ങൾ വാങ്ങുന്നതിന് പകരം വാടക സംവിധാനത്തിലൂടെയാണ് പ്രവർത്തിക്കുന്നത്. ചിലവ് നിയന്ത്രിക്കാനും മൂലധനം കൂടുതൽ ഫലപ്രദമായി ഉപയോഗിക്കാനുമാണ് അവർ ഈ രീതി പിന്തുടരുന്നത്.

ഇതേ മാതൃകയിൽ ഉപയോഗശൂന്യമായതോ കുറഞ്ഞ പ്രയോജനമുള്ളതോ ആയ സർക്കാർ ആസ്തികൾ സുതാര്യമായ രീതിയിൽ വിൽക്കുകയോ ദീർഘകാല വാടകയ്ക്ക് നൽകുകയോ ചെയ്യുന്നത് പരിഗണിക്കാവുന്നതാണ്. നഷ്ടത്തിലായ സ്ഥാപനങ്ങൾ മാത്രമല്ല ചില സാഹചര്യങ്ങളിൽ ലാഭകരമായ ആസ്തികളുടെ ഭാഗിക വിനിയോഗവും പുതിയ വികസന പദ്ധതികൾക്കുള്ള സാമ്പത്തിക സ്രോതസായി മാറാം.

എന്നാൽ ഇത്തരം നടപടികൾ പൂർണ സുതാര്യതയോടെയും അഴിമതിയുടെ നിഴൽപോലുമില്ലാതെയും നടപ്പാക്കപ്പെടണം. രാഷ്ട്രീയ മുന്നണികളുടെ പ്രാതിനിധ്യവും പൊതുജന നിരീക്ഷണവും ഉറപ്പാക്കുന്നത് വിശ്വാസ്യത വർധിപ്പിക്കും.

2. വിനോദസഞ്ചാര മേഖലയുടെ പുതിയ സാധ്യതകൾ

കേരളത്തിന്റെ ഭൂവിസ്തൃതി ചെറുതും ജനസാന്ദ്രത കൂടുതലുമാണെന്നത് യാഥാർഥ്യമാണ്. എന്നാൽ അവയെ വികസനത്തിനുള്ള തടസങ്ങളായി കാണേണ്ടതില്ല. ലോകത്തിലെ നിരവധി ചെറു രാജ്യങ്ങളും നഗര സമ്പദ്‌വ്യവസ്ഥകളും വിനോദ സഞ്ചാരത്തെ അടിസ്ഥാനമാക്കി വലിയ സാമ്പത്തിക മുന്നേറ്റങ്ങൾ കൈവരിച്ചിട്ടുണ്ട്.

പ്രകൃതി സൗന്ദര്യം, ആരോഗ്യ ടൂറിസം, മതപരമായ തീർഥാടന കേന്ദ്രങ്ങൾ, സാംസ്കാരിക പൈതൃകം, കാർഷിക ടൂറിസം, ജലാശയ അധിഷ്ഠിത വിനോദസഞ്ചാരം തുടങ്ങി അനവധി മേഖലകളിൽ കേരളത്തിന് ഇനിയും വളർച്ചയ്ക്കുള്ള വിശാലമായ സാധ്യതകളുണ്ട്. കൂടുതൽ നിക്ഷേപവും നവീന ആശയങ്ങളും ഈ മേഖലയെ സംസ്ഥാനത്തിന്റെ പ്രധാന വരുമാന സ്രോതസുകളിലൊന്നാക്കി മാറ്റാൻ സഹായിക്കും.

3. പുതിയ വരുമാന മാർഗങ്ങളിലേക്കുള്ള ചിന്ത

തൊഴിലവസരങ്ങളുടെ കുറവിനെക്കുറിച്ചുള്ള ആശങ്കകൾ കേരളത്തിൽ വ്യാപകമാണ്. എന്നാൽ തൊഴിൽ എന്ന പരമ്പരാഗത ആശയത്തിനപ്പുറം നിയമപരവും സൃഷ്ടിപരവുമായ വരുമാന മാർഗങ്ങളെക്കുറിച്ചുള്ള ചിന്ത കൂടുതൽ ശക്തമാകേണ്ടതുണ്ട്.

ഡിജിറ്റൽ പ്ലാറ്റ്ഫോമുകൾ, സാമൂഹ്യമാധ്യമങ്ങൾ, ഓഹരി വിപണി, സ്റ്റാർട്ടപ്പുകൾ, ഓൺലൈൻ സേവനങ്ങൾ, ചെറുകിട സംരംഭങ്ങൾ എന്നിവയിലൂടെ വരുമാനം കണ്ടെത്തുന്നവരുടെ എണ്ണം വർധിപ്പിക്കേണ്ടതുണ്ട്. ഉയർന്ന വിദ്യാഭ്യാസ നിലവാരവും സാങ്കേതിക അറിവും ഉള്ള കേരളത്തിലെ യുവജനങ്ങൾക്ക് ഈ മേഖലകളിൽ വലിയ സാധ്യതകളാണുള്ളത്. തൊഴിൽ തേടുന്ന സമൂഹത്തിൽ നിന്ന് അവസരങ്ങൾ സൃഷ്ടിക്കുന്ന സമൂഹത്തിലേക്കുള്ള മാറ്റമാണ് കാലഘട്ടത്തിന്റെ ആവശ്യം.

4. സർക്കാർ സംവിധാനങ്ങളുടെ കാര്യക്ഷമത വർധിപ്പിക്കൽ

സാമ്പത്തിക വളർച്ചയുടെ പ്രധാന ഘടകങ്ങളിൽ ഒന്നാണ് ഭരണ കാര്യക്ഷമത. സ്വകാര്യ മേഖലയിലെ നിരവധി സ്ഥാപനങ്ങളും ബാങ്കുകളും ഉയർന്ന നിലവാരത്തിലുള്ള പ്രവർത്തന രീതികളിലൂടെ മികച്ച സേവനവും ഉൽപാദനക്ഷമതയും കൈവരിക്കുന്നതായി കാണാം. സർക്കാർ ഉദ്യോഗസ്ഥർക്കും ജീവനക്കാർക്കും ഇത്തരം സ്ഥാപനങ്ങളിൽ ഹ്രസ്വകാല പരിശീലനം നൽകുന്നത് പുതിയ പ്രവർത്തന രീതികൾ മനസിലാക്കാനും കാര്യക്ഷമത വർധിപ്പിക്കാനും സഹായകമാകും.

മികച്ച രീതികൾ പഠിച്ച് സർക്കാർ സംവിധാനങ്ങളിൽ പ്രയോഗിക്കുന്നത് സേവന നിലവാരവും പൊതുജന സംതൃപ്തിയും ഉയർത്തും. ഇത്തരത്തിലുള്ള നവീന പരിഷ്കാരങ്ങൾക്ക് രാഷ്ട്രീയ പാർട്ടികളും തൊഴിലാളി സംഘടനകളും പിന്തുണ നൽകേണ്ടതുണ്ട്.

ഒരു പുതിയ ദിശയിലേക്ക്

കേരളത്തിന്റെ മുന്നിലുള്ള വെല്ലുവിളികൾ ചെറുതല്ല. എന്നാൽ അവസരങ്ങളും അത്രത്തോളം വലുതാണ്. ദീർഘകാല വികസന കാഴ്ചപ്പാടോടെയും സാമ്പത്തിക അച്ചടക്കത്തോടെയും സുതാര്യമായ ഭരണ സംവിധാനങ്ങളോടെയും മുന്നേറാൻ കഴിഞ്ഞാൽ കേരളത്തിന് രാജ്യത്തെ ഏറ്റവും വികസിത സംസ്ഥാനങ്ങളിലൊന്നായി മാറാൻ കഴിയും.

2047-ൽ ഇന്ത്യ വികസിത രാഷ്ട്രമാകുന്ന സ്വപ്നം സാക്ഷാത്കരിക്കുമ്പോൾ അതോടൊപ്പം തന്നെ വികസിത സംസ്ഥാനമായി കേരളം നേടിയ നേട്ടങ്ങളുടെ ഒരു ദശാബ്ദം ആഘോഷിക്കുന്ന അവസ്ഥയിലേക്ക് നമുക്ക് എത്തിച്ചേരാനും കഴിയും. അത് ഒരു സ്വപ്നം മാത്രമല്ല; ശരിയായ ദിശയിലുള്ള കൂട്ടായ പരിശ്രമത്തിലൂടെ കൈവരിക്കാവുന്ന ലക്ഷ്യമാണ്. കാരണം വിദ്യാഭ്യാസം, ആരോഗ്യം, സാമൂഹിക വികസനം, മനുഷ്യവിഭവശേഷി തുടങ്ങി നിരവധി മേഖലകളിൽ കേരളം ഇതിനകം തന്നെ രാജ്യത്തിന് മാതൃകയായ നേട്ടങ്ങൾ കൈവരിച്ചിട്ടുള്ള സംസ്ഥാനമാണ്.