വന്ദേഭാരതിനോട് പ്രിയം കൂടുതല്‍ മലയാളിക്ക്; യാത്രക്കാരുടെ എണ്ണത്തില്‍ ഒന്നാം സ്ഥാനം കേരളത്തിലോടുന്ന തീവണ്ടിക്ക്

തിരുവനന്തപുരം: രാജ്യത്താകമാനം ഓടുന്ന 23 വന്ദേഭാരത് എക്‌സ്പ്രസുകളില്‍ യാത്രക്കാരുടെ എണ്ണത്തില്‍ ഒന്നും രണ്ടും സ്ഥാനം കേരളത്തിലോടുന്ന തീവണ്ടിക്ക്.

കാസര്‍കോട്-തിരുവനന്തപുരം വന്ദേഭാരത് സര്‍വീസിനാണ് ഒന്നാംസ്ഥാനം. ഈ വണ്ടിയില്‍ മൊത്തം സീറ്റുകളുടെ 183 ശതമാനമാണ് ശരാശരി യാത്രക്കാര്‍. തിരുവനന്തപുരത്തുനിന്ന് കാസര്‍കോട്ടേക്കു പോകുന്ന സര്‍വീസാണ് രണ്ടാംസ്ഥാനത്ത്. ഈ സര്‍വീസിലെ ശരാശരി യാത്രക്കാരുടെ എണ്ണം 176 ശതമാനമാണ്. സ്റ്റേഷനുകളില്‍ നിന്ന് കയറുന്ന ആകെ യാത്രക്കാരുടെ എണ്ണം കണക്കാക്കിയാണ് ശരാശരി നിശ്ചയിക്കുന്നത്.

കേരളത്തിനു പിന്നിലായി ഗാന്ധിനഗര്‍-മുംബൈ വന്ദേഭാരത് എക്‌സ്പ്രസുണ്ട്. 134 ശതമാനമാണ് ഈ റൂട്ടിലെ തീവണ്ടിയിലെ യാത്രക്കാര്‍. കേരളത്തിലെ വണ്ടികളുടെ യാത്രക്കാരുടെ നിരക്കും മൂന്നാംസ്ഥാനത്തുള്ള സര്‍വീസിലെ നിരക്കും തമ്മില്‍ അമ്പത് ശതമാനത്തിലേറെ വ്യത്യാസമുണ്ട്.