മാപുട്ടോ: ആഫ്രിക്കൻ രാജ്യമായ മൊസാംബിക്കിന്റെ വടക്കൻ മേഖലയിൽ ഭീകരാക്രമണങ്ങൾ വീണ്ടും ശക്തിപ്പെടുന്നു. തീവ്രവാദ ഗ്രൂപ്പുകൾ സാധാരണ ജനങ്ങളെ ലക്ഷ്യമിടുന്നതോടെ നമ്പുല പ്രവിശ്യയിലെ ജനജീവിതം സ്തംഭിച്ചു. വീടുകൾ അഗ്നിക്കിരയാക്കുകയും സ്വത്തുക്കൾ കൊള്ളയടിക്കുകയും ചെയ്യുന്നതിനൊപ്പം കൊലപാതകങ്ങളും തട്ടിക്കൊണ്ടുപോകലുകളും വ്യാപകമാണ്.
നമ്പുല പ്രവിശ്യയിലെ മെംബ, എറാറ്റി ജില്ലകളാണ് നിലവിൽ ആക്രമണത്തിന്റെ പ്രധാന കേന്ദ്രങ്ങൾ. കഴിഞ്ഞ ദിവസങ്ങളിൽ ഇവിടെ വീടുകളും ഒരു സ്കൂളും തീയിട്ട് നശിപ്പിച്ചു. സാധാരണക്കാരെ വകവരുത്തുന്നതും തട്ടിക്കൊണ്ടുപോകുന്നതും ദിനചര്യയായി മാറിയതോടെ ജനങ്ങൾ ഭീതിയിലാണ്.
പ്രവിശ്യാ തലസ്ഥാനമായ മസുവയിൽ നടന്ന ഭീകരാക്രമണത്തിൽ നാല് പേർ കൊല്ലപ്പെട്ടു. ഈ ആക്രമണങ്ങൾക്കു പിന്നിൽ മതപരമായ ഉദ്ദേശ്യങ്ങളുണ്ടായിരുന്നുവെന്ന് പ്രാദേശിക ചാനലായ ടിവി സുസെസോ സംപ്രേഷണം ചെയ്ത വീഡിയോ സൂചിപ്പിക്കുന്നു. തെരുവിൽ തലയറുത്ത നിലയിൽ മൃതദേഹം കണ്ടെത്തിയ സംഭവം പ്രദേശവാസികളെ വലിയ പരിഭ്രാന്തിയിലാഴ്ത്തി.
ആക്രമണങ്ങളെത്തുടർന്ന് ലൂറിയോ, മസുല എന്നിവിടങ്ങളിലെ ജനസംഖ്യയുടെ 80 ശതമാനത്തോളം പേർ പലായനം ചെയ്തതായി പ്രാഥമിക റിപ്പോർട്ടുകൾ പറയുന്നു. അതായത്, ഏകദേശം 128,000 ആളുകൾ സുരക്ഷിത താവളങ്ങൾ തേടി അടുത്തുള്ള വനപ്രദേശങ്ങളിലേക്കോ മറ്റ് ജില്ലകളിലേക്കോ നീങ്ങി. കൂടുതൽ ആക്രമണഭീതിയും അരക്ഷിതാവസ്ഥയും ഈ പലായനത്തിന്റെ തോത് വർദ്ധിപ്പിക്കാൻ സാധ്യതയുണ്ട്.
ഭീകരാക്രമണത്തിന്റെ ദുരിതങ്ങൾക്കിടയിലും മെംബ ജില്ലയിൽ കോളറ പകർച്ചവ്യാധി പടരുന്നത് ആശങ്ക വർദ്ധിപ്പിക്കുന്നു. ഇതിനുപുറമെ മഴക്കാലത്തിന്റെയും ചുഴലിക്കാറ്റിന്റെയും ആരംഭം കൂടി ആയതോടെ, പ്രദേശവാസികൾക്ക് ദുരിതം ഇരട്ടിയായി.
അതേസമയം നമ്പുലയിലെ വടക്കൻ ജില്ലകളിൽ ഇടയ്ക്കിടെ ഭീകരാക്രമണങ്ങൾ നടക്കുന്നുണ്ടെങ്കിലും രാജ്യത്തിന്റെ രാഷ്ട്രീയ, സൈനിക സ്ഥിതി സുസ്ഥിരമാണെന്ന് കഴിഞ്ഞ ആഴ്ച പ്രസിഡന്റ് ഡാനിയേൽ ചാപ്പോ പ്രസ്താവിച്ചിരുന്നു. എന്നാൽ നിലവിലെ സ്ഥിതിഗതികൾ പ്രസിഡന്റിന്റെ വാദങ്ങളെ ചോദ്യം ചെയ്യുന്ന തരത്തിലാണ്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.