പ്രവാസികൾക്ക് കരുതൽ; ചങ്ങനാശ്ശേരി അതിരൂപത പ്രവാസി അപ്പോസ്തലേറ്റും ചെത്തിപ്പുഴ സെ. തോമസ് ഹോസ്പിറ്റലും കൈകോർക്കുന്നു

കോട്ടയം : ചങ്ങനാശേരി പ്രവാസി അപ്പോസ്തലേറ്റും ചെത്തിപ്പുഴ സെന്റ് തോമസ് ഹോസ്പിറ്റലും ചേർന്ന് പ്രവാസികൾക്കായി ഒരുക്കുന്ന കരുതൽ പദ്ധതിയുടെ രജിസ്ട്രേഷൻ ആരംഭിച്ചു. നിലവിൽ പ്രവാസികളായിട്ടുള്ളവർക്കും നാട്ടിൽ തിരികെയെത്തിയ പ്രവാസികൾക്കും അവരുടെ ഏറ്റവും അടുത്ത ബന്ധുക്കൾക്കും ഈ സൗകര്യം പ്രയോജനപ്പെടുത്താം.

പ്രായമായ മാതാപിതാക്കളെ കുറഞ്ഞ ചിലവിൽ വീട്ടിലെത്തി ചികിൽസിക്കുന്ന ശുശ്രൂഷയാണ് ഇതിൽ ഏറ്റവും പ്രധാനം. നാട്ടിൽ അവധിക്ക് പ്രവാസികൾക്ക് നേരിട്ട് അപ്പോയ്ന്റ്മെന്റ് ലഭിക്കുന്ന സാഹചര്യം തുടങ്ങി വിവിധ സൗകര്യങ്ങൾ ഈ പദ്ധതിയിലൂടെ പ്രവാസികൾക്കായി നൽകുന്നു. ഒരു വർഷത്തേന് 4500 രൂപ മുതൽ 10000 രൂപ വരെയുള്ള മൂന്ന് പാക്കേജുകളാണ് കരുതൽ പദ്ധതിയിൽ ഉൾപ്പെടുത്തിയിട്ടുള്ളത്.

മൂന്ന് മാസത്തിലൊരിക്കൽ ഡോക്റിന്റെയും നേഴസിന്റെയും സേവനം വിട്ടിൽ ലഭ്യമാക്കി ബിപി ഷു​ഗർ തുടങ്ങിയവ പരിശോധിക്കുന്നതാണ് 4500 രൂപയുടെ പാക്കേജ്. മാസത്തിലൊരിക്കൽ ഡോക്ടറിന്റെയും നഴ്സിന്റെയും സേവനം വീട്ടിലെത്തിച്ച് ബിപി ഷു​ഗർ തുടങ്ങിയവ പരിശോധിക്കുന്നതാണ് 9000 രൂപയുടെ രണ്ടാമത്തെ പാക്കേജ്. പതിനായിരം രൂപയുടെ പാക്കേജിൽ മൂന്ന് മാസത്തിലൊരിക്കൽ ഡോക്റിന്റെയും നേഴസിന്റെയും സേവനം വിട്ടിൽ ലഭ്യമാക്കും. ബിപി, ഷു​ഗർ, ആർബിഎസ്, ആർഎഫ്ടി, എൽഎഫ്ടി തുടങ്ങിയ നിരവധി പരിശോധനകൾ ഇതിൽ ഉൾപ്പെടുന്നു. ഇതേക്കുറിച്ച് കൂടുതൽ വിവരങ്ങൾ അറിയേണ്ടവർ പ്രവാസി അപ്പോസ്തലേറ്റ് അതിരൂപതാ ഓഫിസുമായി ബന്ധപ്പെടാവുന്നതാണ്.

ചങ്ങനാശേരി അതിരൂപത ആർച്ച് ബിഷപ്പ് മാർ ജോസഫ് പെരുന്തോട്ടം പിതാവിന്റെ പ്രത്യേക നിർദേശ പ്രകാരം ആരംഭിച്ച ഈ സൗകര്യങ്ങൾ പ്രയോജനപ്പെടുത്താൻ എല്ലാവരും പ്രത്യേകം ശ്രദ്ധിക്കണമെന്ന് പ്രവാസി അപ്പോസ്തലേറ്റ് ഡയറക്ടർ ഫാ. റ്റെജി പുതുവീട്ടിൽകളം, സെ. തോമസ് ഹോസ്പിറ്റലിൽ ഡയറക്ടർ ഫാ ജെയിംസ് പി കുന്നത്ത് എന്നിവർ സംയുക്തമായി അറിയിച്ചു.