ഛത്തീസ്ഗഡിൽ ക്രൈസ്തവർക്ക് നേരെ അതിക്രമങ്ങൾ വർധിക്കുന്നു ; 40 ദേവാലയങ്ങൾ പൊളിച്ചു നീക്കണമെന്ന് ആവശ്യം

കബീർദാം: ഛത്തീസ്ഗഡിലെ കബീർദാം ജില്ലയിലും സമീപ മേഖലകളിലും ക്രൈസ്തവ വിശ്വാസികൾക്കും ദേവാലയങ്ങൾക്കും നേരെ കടുത്ത പ്രതിഷേധങ്ങളും അടിച്ചമർത്തൽ നീക്കങ്ങളും ശക്തമാകുന്നതായി റിപ്പോർട്ടുകൾ. നൂറുകണക്കിന് ഗ്രാമീണരും തീവ്ര ഹിന്ദുത്വ സംഘടനകളും ചേർന്ന് നടത്തിയ പ്രക്ഷോഭങ്ങളും മാർച്ചുകളും മേഖലയിൽ വലിയ ആശങ്കയാണ് സൃഷ്ടിച്ചിരിക്കുന്നത്.

ഭണ്ഡാരിയ, ഭേദരാ മേഖലകളിലെ 18-ഓളം ഗ്രാമങ്ങളിൽ നിന്നുള്ള പ്രക്ഷോഭകർ കലക്ടറേറ്റിലേക്ക് മാർച്ച് നടത്തുകയും പ്രാർത്ഥനയ്ക്കായി വിശ്വാസികൾ ഒത്തുചേരുന്ന 40-ഓളം ദേവാലയങ്ങളും പ്രാർത്ഥനാലയങ്ങളും പൊളിച്ചുനീക്കണമെന്ന് ആവശ്യപ്പെട്ട് അധികാരികൾക്ക് നിവേദനം സമർപ്പിക്കുകയും ചെയ്തു.

വനമേഖലകളിൽ മിഷണറിമാരുടെ നേതൃത്വത്തിൽ നിയമവിരുദ്ധ പ്രവർത്തനങ്ങൾ നടക്കുന്നുവെന്നാണ് പ്രക്ഷോഭകരുടെ പ്രധാന ആരോപണം. കൂടാതെ, ക്രൈസ്തവ വിശ്വാസം സ്വീകരിച്ച ആദിവാസി സഹോദരങ്ങൾക്ക് ഭരണഘടനാപരമായി ലഭിക്കേണ്ട ആനുകൂല്യങ്ങൾ തടയണമെന്നും ഇവർ ആവശ്യപ്പെടുന്നു. എന്നാൽ വിശ്വാസത്തിന്റെ പേരിൽ ഗ്രാമങ്ങളിൽ കടുത്ത വിവേചനമാണ് ദൈവജനത്തിന് നേരിടേണ്ടി വരുന്നത്.

മരിച്ചവരെ അടക്കം ചെയ്യാൻ സെമിത്തേരി സ്ഥലം നിഷേധിക്കുക, കുടിവെള്ളവും റേഷൻ സാധനങ്ങളും തടയുക, തൊഴിലവസരങ്ങൾ ഇല്ലാതാക്കുക, വിദ്യാലയങ്ങളിൽ കുട്ടികളെ മാനസികമായി പീഡിപ്പിക്കുക തുടങ്ങിയ ക്രൂരതകൾ നേരിട്ടിട്ടും ക്രിസ്തുവിലുള്ള പ്രത്യാശയിൽ അവർ നിലകൊള്ളുന്നു.

പുതിയ മതപരിവർത്തന നിരോധന നിയമങ്ങൾ പ്രാബല്യത്തിൽ വന്നതോടെ ന്യൂനപക്ഷമായ ക്രൈസ്തവർക്ക് നേരെയുള്ള അതിക്രമങ്ങൾ വർഷങ്ങളായി വർദ്ധിച്ചുവരികയാണ്. സംസ്ഥാനത്തെ ആകെ ജനസംഖ്യയുടെ രണ്ട് ശതമാനം മാത്രം വരുന്ന ക്രൈസ്തവ സമൂഹത്തിന് നേരെ 2024-ൽ 165-ഉം, 2025-ൽ 177-ഉം അതിക്രമ സംഭവങ്ങളാണ് രേഖപ്പെടുത്തിയിട്ടുള്ളത്.

"ലോകത്തിൽ നിനക്ക് പീഡനങ്ങൾ ഉണ്ടാകും എങ്കിലും ധൈര്യമായിരിക്കുക, ഞാൻ ലോകത്തെ ജയിച്ചിരിക്കുന്നു" എന്ന കർത്താവിന്റെ വാഗ്ദാനത്തിലാണ് തങ്ങൾ ജീവിക്കുന്നതെന്ന് പ്രദേശത്തെ വൈദികരും വിശ്വാസികളും സാക്ഷ്യപ്പെടുത്തുന്നു. കഷ്ടതകളുടെയും ഭീഷണികളുടെയും മധ്യത്തിലും സുവിശേഷത്തിന് സാക്ഷികളായി നിലകൊള്ളുന്ന ഛത്തീസ്ഗഡിലെ വിശ്വാസി സഹോദരങ്ങൾക്കായി ആഗോളസഭ പ്രാർത്ഥനയോടെ ഒത്തുചേരുകയാണ്.