തിരുവനന്തപുരം: സംസ്ഥാനത്തെ സ്വയംഭരണ കോളജുകളില്‍ പുതിയ കോഴ്സുകള് അനുവദിക്കുന്നതിന് സര്‍ക്കാര്‍ ഇളവ് അനുവദിച്ചു.
സ്വാശ്രയ സ്വയംഭരണ കോളജുകളില്‍ പുതിയ കോഴ്സുകള് ആരംഭിക്കുന്നതിനോ, എയ്ഡഡ് സ്വയംഭരണ കോളജുകളില്‍ സ്വാശ്രയ സ്ട്രീമിന് കീഴില്‍ പുതിയ കോഴ്സുകള് ആരംഭിക്കുന്നതിനോ സര്‍ക്കാര്‍ എന്‍ഒസി ആവശ്യമില്ലെന്ന് ഉന്നത വിദ്യാഭ്യാസ വകുപ്പ് പുറത്തിറക്കിയ സര്‍ക്കുലറില്‍ വ്യക്തമാക്കി.
ഇത്തരം കോളജുകളില്‍ സീറ്റുകള്‍ സ്ഥിരമായി വര്‍ധിപ്പിക്കുന്നതിനും എന്‍ഒസി ആവശ്യമില്ല. എന്നാല്‍ സ്വയംഭരണ കോളജുകള്‍ സ്വാശ്രയ രീതിയില്‍ പുതിയ കോഴ്സുകള് ആരംഭിക്കുന്ന വിവരം സര്‍ക്കാരിനെ മുന്‍കൂട്ടി അറിയിക്കണം.
മാത്രമല്ല, സ്വാശ്രയ കോളജുകളില്‍ പുതിയ കോഴ്സുകള് ആരംഭിക്കുന്നതിന് സര്‍ക്കാരിന്റെ എന്‍ഒസി ആവശ്യമാണ്. പക്ഷേ നിലവില്‍ നടത്തി വരുന്ന കോഴ്സുകളുടെ സീറ്റ് വര്‍ധനയുമായി ബന്ധപ്പെട്ട് സര്‍വകലാശാലകള്‍ക്ക് തന്നെ സീറ്റ് വര്‍ധിപ്പിച്ച് നല്‍കാവുന്നതാണ്. ഇതിന് സര്‍വകലാശായുടെയോ ബന്ധപ്പെട്ട റഗുലേറ്ററി അതോറിറ്റിയുടെയോ അനുമതി മാത്രം മതിയെന്നും സര്‍ക്കുലറില്‍ പറയുന്നു.
അതേസമയം സര്‍ക്കാര്‍/ എയ്ഡഡ്/ എയ്ഡഡ് സ്വയംഭരണ കോളജുകളില്‍ എയ്ഡഡ് സ്ട്രീമിന് കീഴില്‍ പുതിയ കോഴ്സുകള് ആരംഭിക്കുന്നതിനോ അല്ലെങ്കില്‍ നിലവിലുള്ള കോഴ്സുകളില്‍ സീറ്റുകള്‍ സ്ഥിരമായി വര്‍ദ്ധിപ്പിക്കുന്നതിനോ സര്‍ക്കാരിന്റെ എന്‍ഒസി ആവശ്യമാണ്.
സംസ്ഥാനത്തെ സര്‍വകലാശാലകളുമായി അഫിലിയേറ്റ് ചെയ്തിട്ടുള്ള സ്വാശ്രയ കോളജുകള്‍ക്ക് അവരുടെ സ്ഥാപനത്തില്‍ അനുവദിക്കപ്പെട്ട കോഴ്സുകളുമായി ബന്ധപ്പെട്ട എന്‍ഒസി നിബന്ധനയിലും ഇളവ് അനുവദിച്ചു. വര്‍ഷാവര്‍ഷം സര്‍ക്കാര്‍ തലത്തില്‍ എന്‍ഒസി പുതുക്കി നല്‍കുന്ന രീതി അവസാനിപ്പിച്ചു.
2026-27 അധ്യയന വര്‍ഷം മുതല്‍ മൂന്ന് വര്‍ഷത്തില്‍ ഒരിക്കല്‍ എന്‍ഒസി മുന്‍കൂറായി പുതുക്കിയാല്‍ മതിയെന്നും സര്‍ക്കുലറില്‍ പറയുന്നു. ഒരു അക്കാദമിക വര്‍ഷത്തില്‍ അഡ്മിഷന്‍ നടപടികള്‍ പൂര്‍ത്തിയായതിന് ശേഷം ബന്ധപ്പെട്ട സര്‍വകലാശാലയ്ക്ക് കീഴിലെ കോളജുകളില്‍ പുതുതായി ആരംഭിച്ച കോഴ്സുകളുടെയും ഓരോ കോളജിലെയും സീറ്റ് വര്‍ധനവിന്റെയും വിവരം സര്‍ക്കാരിന് നിര്‍ബന്ധമായി റിപ്പോര്‍ട്ട് ചെയ്യേണ്ടതാണെന്നും സര്‍ക്കുലറില്‍ പറയുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.